JAFO: Vijana acheni historia katika utendaji kazi wenu.

Imewekwa tar.: August 15th, 2019

Waziri wa Nchi Ofisi ya Rais Tawala za Mikoa na Serikali za Mitaa Mhe Selemani Jafo amewataka vijana wanaoteuliwa kufanyakazi kwenye maeneo yoyote nchini kuhakikisha wanafanyakazi kwa weledi ili kuacha alama ambayo haitafutika nchini.

Ameyasema hayo leo wakati wa maadhimisho ya siku ya Kimataifa ya Vijana iliyofanyika katika ukumbi wa Mikutano wa Chuo cha Mipango Jijini Dodoma.

Mhe Jafo amesema Vijana wanaopewa nafasi za kuongoza kuacha kufanya kazi kwa maigizo na badala yake wachape kazi katika kuwahudumia wananchi ili kuacha historia katika jamii.

“Vijana acheni maigizo fanyeni kazi ya kuwasaidia Watanzania fanyakazi kwa ajili ya kuwahudumia watu,fanya kazi yako itangazike,tukifanya maigizo hatuwezi kulisaidia Taifa letu” Anasisitiza Mhe. Jafo

Mhe. Jafo anaendelea kufafanua kuwa kila kijana akiwajibika katika nafasi yake aliyopewa atalisaidia taifa kukuwa kiuchumi na hatimaye kufikia uchumi wa kati hivyo nawaagiza vijana kuhakikisha mnatimiza majukumu yenu katika nafasi mnazopewa kwenye jamii.

“Vijana mkipewa nafasi fanyeni kazi, usikubali kuondoka sehemu bila kuacha alama lazima uache alama ili wakukumbuke,kijana kuwa mfano wa kuigwa katika jamii inayokuzunguka,”alisema Jafo.

Mhe. Jafo amewataka vijana kuhakikisha wanaleta mabadiliko katika sekta zote kwa kubadilisha mitazamo na kuleta maendeleo katika jamii ili nchi iweze kusonga mbele.

Wakati huohuo amewataka kuchangamkia fursa ya mikopo ambayo imekuwa ikitolewa na Halmashauri ambapo amedai kwa sasa kina mama ndio wamekuwa wakichangamkia fursa hiyo.

Amesema Serikali kupitia Halmashauri zote nchini imeweza kutenga fedha za mikopo kwa wanawake, vijana na watu wenye ulemavu lakini wanaojitokeza hadi sasa kuchukua fedha hizo ni wanawake pekee jambo ambalo si jema katika kuleta maendeleo kwa jamii.

“Inasikitisha kuona Serikali kupitia Halmashauri zake imeweza kutenga fedha kwa ajili ya kuwakopesha wanawake, vijana na watu wenye ulemavu lakini wanaokopa kwa wingi ni kina mama hili si jambo jema kabisa nawahamasisha vijana kukopa fedha ili kujikwamua kiuchumi.” Amesema Jafo

Kwa Upande wake,Naibu Katibu Mkuu,Wizara ya Vijana,Sanaa,Utamaduni na Michezo,Zanzibar,Amour Hamil Bakari,amesema Serikali ya Jamhuri ya Muungano wa Tanzania na Serikali ya Mapinduzi Zanzibar zitaendelea na juhudi zake za kuhakikisha vijana wanapata kazi pamoja na kufanya kazi zenye staha.

 “Serikali itaendelea kuhakikisha vijana wetu wanapata kazi zenye staha pamoja na changamoto ya ajira.Niwakumbushe vijana kuendelea kulinda amani iliyopo, suala la kudumisha muungano wetu hili halina mjadala na sisi tutaendelea kuwakumbusha vijana kuhakikisha wanalinda muungano kwa nguvu zote,”Amesema Bakari

Naye,Mwakilishi Mkazi wa Shirika la Umoja wa Mataifa la Idadi ya Watu Duniani (UNFPA) Jacqueline Mahon alisema vijana  wanatakiwa kusaidiwa katika kutatua changamaoto mbalimbali ili kuwawezesha kuleta mabadiliko katika jamii na Taifa kwa ujumla.

Na Angela Msimbira OR-TAMISEMI