Jafo awapongeza Wadau wa Sekta ya Afya

Imewekwa tar.: August 18th, 2018

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo  amesema katika kuboresha afya kunahitajika uwepo wa wadau wengine ili waweze kuunga mkono juhudi za serikali  katika kuwahudumia wananchi kwa kuwapatia huduma wanazozihitaji kwa ulinzi wa afya zao.

Akifunga mkutano wa wadau wa maendeleo katika sekta ya afya uliofanyika katika ukumbi wa Kilimani  leo Jijini Dodoma Mhe. Jafo amesema kuwa kama hakuna nia dhabiti ya kisiasa ya kiongozi wa nchi Sekta ya afya haiwezi kufanikiwa.

Amewashukuru wadau wa maendeleo katika Sekta ya Afya  kwa  kushirikiana na Serikali katika kuwekeza  kwa ajili ya kuwahudumia wananchi  maskini walipo katika Mamlaka za Serikali za Mitaa Nchini.

Amesema kuwa Rais wa Jamhuri wa Muungano wa Tanzania Mhe. John Pombe Magufuli ameamua kutekeleza Ilani ya Chama Cha mapinduzi kwa vitendo kwa kusimamia kwa dhati sekta ya afya nchini  hivyo wadau wa maendeleo katika sekta ya afya hawanabudi kuunga mkono juhudi hizo.

Akiongelea suala la utekelezaji wa majukumu kwa weledi Mhe. Jafo amesema viongozi waliopewa dhamana wana wajibu wakuhakikisha  wanakuwa mfano wa kukumbukwa na jamii katika kutimiza wajibu wao  wa kuwahudumia wananchi  maskini ambao wanahitaji huduma bora za afya nchini.

Amewapongeza  Wanganga Wakuu wa Mikoa na  Wilaya  kwa weledi na kutumia taaluma zao katika kushauri kitaalam jinsi ya kujenga vituo vya afya nchini jambo ambalo limesaidia kuhakikisha kuwa vituo vinakamilika kwa wakati na kwa gharama zilizokusudiwa na Serikali.

‘’Kwa gharama ya shilingi milioni 500 wameweza kujenga wodi ya Wazazi, Chumba cha upasuaji, maabara, chumba cha kuhifadhia maiti,  maeneo ya kutembelea wagonjwa, vichomea taka kweli  mnahitaji pongezi kwa kuwa bila maelekezo na usimamizi wenu majengo hayo yasingepatikana” Anasema Jafo

Amewaagiza kuendeleza taaluma yao kwa kufanyakazi kwa uadilifu na weledi  kwa kuwa taifa linawategemea katika kutatua changamoto za sekta ya afya na kuleta mabadiliko lengo likiwa ni kutoa huduma bora kwa jamii.

Amewataka kuhakikisha wanawasimamia wahudumu wa afya nchini na kuwataka kutumia lugha nzuri kwa wananchi ili wagonjwa waweze kuvutiwa kuja kupata huduma katika vituo vya afya nchini, na wabadilishe sekta ya afya kuwakuvifanya kuvutia  na kuwafanya wananchi  kuvutika kabla ya kupatiwa matibabu.

Mhe. Jafo amewataka kuhakikisha wanajenga imani kwa wananchi kuwa Serikali inawajali na kuwadhamini katika suala zima la utoaji huduma bora za afya nchini.

Amewashukuru wadau  wa maendeleo ya sekta ya afya nchini kwa kutenga fedha kwa ajili ya kuendeleza Sekta ya afya  na kusababisha ujenzi wa vituo vya afya unakamilika kwa wakati.

Aidha amewataka Waganga Wakuu wa Mikoa kuhakikisha  wanasimamia Hospitali   na vituo vya afya nchini  kwa kuhakikisha wanafunga mifumo ya kielektoniki ili kuweza kukusanya mapato na kupunguza ubadhilifu wa  wa mapato nchini.