Jafo atoa maagizo mazito kwa Halmashauri ya Wilaya ya Mlele

Imewekwa tar.: June 3rd, 2020

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo amemuagiza Katibu Mkuu Ofisi ya Rais Tawala za Mikoa na Serikali za Mitaa Mhandisi Joseph Nyamhanga kumrejesha aliyekuwa afisa manunuzi katika Halmashauri ya Wilaya ya Mlele Mkoani Katavi.

Ametoa maagizo hayo leo wakati akiongea na watumishi wa Halmashauri ya Manispaa ya Mpanda wakati akiwa kwenye ziara ya  kikazi ya  kukagua miradi ya maendeleo inayotekelezwa  katika Halmashauri ya Manispaa ya Mpanda Mkoani Katavi.

Mhe. Jafo ameyasema hayo baada ya kubaini ubadhilifu wa fedha za Serikali uliofanywa na Afisa huyo ambaye alihamishwa kutoka Halmashauri ya Wilaya ya Mlele na kuhamishwa kituo kingine cha kazi.

Amemwagiza Mhandisi Nyamhanga kuunda tume ya uchunguzi wa ubadhilifu wa fedha za serikali kwa mtumishi hiyo ambaye kwa sasa amehamishwa kwenda kituo kingine cha kazi na tume hiyo itatoa taarifa na ushauri wa kufanya katika Halmashauri ya Wilaya ya Mlele Mkoani Katavi

“Haiwezekani mtumishi afanye  ubadhilifu wa fedha za Serikali kisha ahamishwe kituo cha kazi, huo si utaratibu, Ninamuagiza Katibu Mkuu kutengua uhamisho huo na kurejeshwa kwenye kituo cha awali ili kujibu tuhuma” Amesisitiza Mhe. Jafo

Amesema kuwa Halmashauri ya Wilaya ya Mlele imekuwa ikisuasua katika utekelezaji wa  miradi ya maendeleo kutokana na uzembe  wa baadhi ya watumishi katika kutekeleza majukumu yao jambo ambalo  linarudisha nyuma  juhudi za Serikali za kuleta maendeleo kwa jamii.

Mhe. Jafo anafafanua kuwa baadhi ya watumishi wanaopatiwa dhamana ya wanatumia madaraka waliyonayo kinyume na utaratibu  na kupelekea kutotenda haki kwa wananchi jambo ambalo linaongeza malalamiko kwa wananchi watunaowahudumia.

“Viongozi tunaopewa dhamana na wananchi, tutende haki, tuache majivuno na tuache kudharau watumishi wengine bali  fanyeni kazi kwa kufuata Sheria, Taratibu na miongozo ya kiutumishi wa umma lengo likiwa ni kutoa huduma bora kwa jamii” Amesisitiza Mhe. Jafo.

 Mhe. Jafo amemuagiza Mkuu wa Mkoa wa Katavi kuhakikisha takukuru wanafanya uchunguzi wa kina kubaini tatizo la ubadhilifu wa fedha za umma katika Halmashauri ya Wilaya ya Mlele.

Aidha, Mhe. Jafo amewataka watumishi kufanyakazi kwa uadilifu kwa kufuata sheria, taratibu  na miongozo ya kiutumishi wa umma  kwa kufanya hivyo kutapunguza malalamiko na kuziletea maendeleo Halmashauri zote nchini.

Akizindua nyumba za watumishi wa Halmashauri ya  Manispaa ya Mpanda Mhe. Jafo ameipongeza Halmashauri ya Wilaya ya Mpanda  kwa kuhakikisha wanajenga nyumba za watumishi kwa kutumia Force Account jambo ambalo limesaidia kupunguza gharama katika ujenzi huo.

Naye Mkuu wa Mkoa wa Katavi amemshukuru Rais wa Jamhuri ya Muungano wa Tanzania Mhe. John Pombe Magufuli kwa kuhakikisha Mkoa wa Katavi unafikika kwa kujengewa miundombinu ya barabara na Stendi hali iliyoleta mabadiliko makubwa katika kukuza uchumi wa wananchi na Mkoa kwa ujumla.

Aidha, Mhe. Jafo yupo kwenye ziara ya kikazi katika Mkoa wa Kitavi kukagua miradi inayotekeleza katika Halmashauri ya Manispaa ya Katavi ambapo amezindua nyumba za watumishi, kutembelea ujenzi wa  ofisi ya Mkoa wa Katavi na ukaguzi wa barabara zenye urefu wa kilometa 7.7 zilizojengwa chini ya mradi wa Uendelezaji Miji (ULGSP)

Na. Angela Msimbira KATAVI