JAFO atoa maagizo mazito Halmashauri ya Wilaya ya Longido.

Imewekwa tar.: July 9th, 2020

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo amemuagiza  Mkurugenzi  na Wakuu wa Idara wa Halmashauri ya Wilaya ya Longido Mkoani Arusha kuhakikisha  wanawasilisha barua za kujieleza kwa nini wasichukuliwe hatua kwa kushindwa kusimamia ujenzi wa miradi kikamilifu.

Ametoa agizo hilo leo wakati akikagua miradi ya maendeleo inayotekelezwa na Halmashauri ya Wilaya ya Longido, Mkoani Arusha  

Akikagua miradi ya Ujenzi wa Hospitali ya Wilaya ya Longido  pamoja na Kituo cha Afya, Mhe. Jafo ameonesha kukerwa na usimamizi hafifu uliopelekea miradi hiyo kusuasua na kushindwa kukamilika kwa wakati.

Akiwa katika jengo la Hospitali ya Wilaya ambapo Serikali ilileta Bilioni 1.5 kwa awamu ya kwanza sambamba na Halmashauri zingine nchini, Mhe Jafo amebaini kuwa licha ya fedha kutumika bado ujenzi hauridhishi huku wananchi wakiwa wanataka huduma.

‘’ Inasikitisha sana kuona Halmashauri za mbali kama Karagwe, Kyerwa na Nyasa wamekamilisha ujenzi  wa Hospitali za Wilaya, hivi sasa Serikali imeongeza shilingi milioni 300 ili kukamilisha mapungufu yaliyobaki lakini bado Hospitali ya Wilaya ya Lungido haijakamilika na mnahitaji fedha zaidi kwa ajili ya kukamilisha hilo haliwezekani” Amesisitiza Mhe. Jafo

Mhe. Jafo, ameielekeza pia Kamati ya Ulinzi na Usalama kukaa na kufanya tathmini ya kina juu ya miradi hiyo ikiwa ni pamoja na kubaini kilichopelekea kushindwa kukamilika kwa wakati.

Akikagua ujenzi wa Kituo cha afya cha Oriendeki katika Halmashauri hiyo, Mhe. Jafo amesikitishwa na hali ya mradi huo huko akieleza kuwa zipo Halmashauri zilizopewa Milioni 400 na tayari zimekamilisha tofauti na kituo hicho kilichopatiwa shilingi milioni 700 lakini hadi sasa ujenzi haujakamilika.

‘’ Ukiangalia hata eneo lenyewe limetelekezwa, hakuna kazi inayoendelea hapa, Mkurugenzi na watu wako kwa maana Timu ya Menejimenti (CMT) mnatakiwa kuwasilisha barua za kujieleza siku ya Ijumaa wiki hii Ofisini kwangu kwani hali hii niliyoikuta hapa imenisikitisha sana’’. Amesema Mhe. Jafo.

Ameitaka Timu ya Manejimenti ya Halmashauri ya Wilaya ya Longido kijitathmini katika suala zima la kiutendaji kwa kuwa  bado miradi mingi ya halmashauri hiyo hairidhishi na ipo nyuma wakati Serikali  inaelekeza fedha nyingi katika suala la maendeleo kwenye Halmashauri hiyo.

Aidha Waziri wa Nchi Ofisi ya Rais Tawala za  Mikoa na Serikali za Mitaa Mhe. Selemani Jafo  anaendelea  na ziara yake  katika Mkoa wa Arusha kwa lengo la kukagua miradi ya maendeleo inayotekelezwa  katika Mkoa huo.