JAFO ashukuru ufadhili wa Dkt Ombeni Msuya

Imewekwa tar.: September 6th, 2019

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo amemshukuru  ufadhili wa Dkt. Ombeni Msuya kwa udhubutu wa kuwasaidia  vijana 23 waliofaulu na kuchaguliwa kujiunga na Kidatu cha tano lakini hawakuweza kujiunga kutokana na mazingira magumu waliyonayo.na hivyo kushindwa kujiunga na masomo hayo.

Ameyasema hayo leo wakati akikabidhiwa nakala ya malipo ya wanafunzi 23 waliochaguliwa kujiunga na kidato cha tano kwa mwaka 2019/2020 katika shule mbalimbali nchini, zoezi ambalo lililofanyika katika Ofisi ya Rais Tawala za Mikoa na Serikali za Mitaa, Jijini Dodoma.

Mhe. Jafo amesema ufadhili huo umesaidia wanafunzi ambao wameshindwa kuendelea na masomo kutokana na mazingira magumu kupata nafasi ya kuendelea na masomo jambo ambalo linasaidia kuendeleza elimu kwa jamii yenye uhitaji nchini.

“Inasikitisha kuona baadhi ya wanafunzi nchini wamefaulu vizuri lakini kwa kukosa ada na sare za shule wanashindwa kuendelea na masomo kutokana na mazingira magumu waliyonayo hali hii inarudisha nyuma juhudi za Serikali za kutatua changamoto mbalimbali za elimu nchini” Amesema Jafo

Amewaomba wadau wa elimu nchini kujitokeza kwa wingi katika kuwawezesha wanafunzi wenye uhitaji nchini hasa wanaoishi katika mazingira magumu na wamefaulu vizuri katika masomo yao ili kuwapa matumai mapya ya maisha na kutatua changamoto za elimu nchini.

Mhe. Jafo amewashukuru wadau wa elimu nchini kwa kujitoa na kusaidia kuchagiza makundi mbalimbali kwa ajili ya kutoa zawadi kwa wanafunzi na waalimu waliofanya vizuri  mashuleni jambo ambalo limeongeza ari ya wanafunzi kuongeza juhudi katika masomo yao na waalimu kujitoa kwa moyo katika kufundisha kwa bidi hali ambayo inasaidia kueleta mabadiliko katika sekta ya Elimu nchini.

Naye Dkt. Msuya amesema  lengo la ufadhili huo ni kusaidia kuinua elimu ya Tanzania kwa kuwasaidia wahitaji hasa wale wanaoishi katika mazingira magumu ili kutatua changamoto zinazojitokeza katika elimu.

Amesema vigezo vilivyoyumika katika kuwapata wanafunzi hao na kupatiwa ufadhili ni wanafunzi waliochaguliwa kujiunga na kidato cha tano na kushindwa kuendelea kutokana changamoto ya mazingira magumu, walemavu na watoto wa kike ambao wanakwama kupata elimu.

Dkt. Msuya amesema kuwa udhamini huo umeanza tangu mwaka 2018 ambapo wanafunzi 14 walisaidiwa kulipiwa karo ya shule na kununuliwa sare za shule ambapo kwa  mwaka  wa fedha 2019/2020 wamelipa gharama ya shilingi milioni 3.5  kwa  wanafunzi 23.

Aidha amesema kuwa program hiyo kwa sasa imeweza kuwafadhili  wanafunzi wa  kiume 17 na wanafunzi wa kike 23 katika Mikoa 26 ya Tanzania Bara, lengo likiwa ni kuunga mkono juhudi za Serikali za kuinua elimu nchini

Na. Angela Msimbira OR-TAMISEMI