JAFO asema siku tisa zilizobaki ni lazima miradi ikamilike

Imewekwa tar.: February 6th, 2020

Waziri wa Nchi Ofisi ya Rais Tawala za Mkoa na Serikali za Mitaa Mhe. Selemani Jafo ameuagiza uongozi wa Halmashauri ya Jiji la Dodoma kuhakikisha ujenzi wa Miradi ya soko na stendi Dodoma inakamilika ifikapo Februari 15, 2020 kama Rais Dkt John Magufuli alivyoelekeza.

Ametoa maagizo hayo leo wakati akikagua maendeleo ya ujenzi wa miradi hiyo inayojengwa kupitia Mradi wa Uendelezaji Miji Mkakati Tanzania (Tanzania Strategic Cities Project) inayotekelezwa katika Halmashauri ya Jiji la Dodoma.  

Mhe. Jafo amesema kuwa Rais wa Jamhuri ya Muungano wa Tanzania Mhe.Dkt. John Pombe Magufuli alipokuwa akiweka jiwe la msingi wa mradi huo alimwagiza mkandarasi anayetekeleza miradi hiyo kuhakikisha wanakamilisha ujenzi ifikapo Februari 15, 2020, hivyo ni wajibu wa mkandarasi huyo kutimiza maagizo hayo kwa wakati uliotolewa.

Amesema kuwa ameridhishwa na kiwango cha ujenzi uliofanyika katika miradi hiyo, kwa kuwa mkandarasi huyo ameonyesha uzalendo wa dhati wa kujenga majengo yenye uimara wa hali ya juu lakini hadi kufikia februari, 15, 2020 wahakikishe wamekamilisha kazi na majengo hayo yanaanza kutumika.

“ Nimeridhishwa na ujenzi wa miradi hii ya Soko na stendi ya mabasi, kwa kuwa vimejengwa  kwa uimara mkubwa,hasa katika umaliziaji wa majengo, na ubora wa kazi uliofanyika lakini nasisitiza kuhakikisha  kazi hiyo inakamilika kwa muda uliopangwa” amesisitiza Mhe. Jafo

Amemuagiza mkandarasi Mohamed Builders  kuhakikisha wanaongeza nguvukazi na kufanya kazi usiku na mchana ili kuweza kukamilisha kwa wakati na wananchi wa Mkoa wa Dodoma waweze kupata huduma bora na kwa wakati uliopangwa.

Wakati Huohuo, Mhe Jafo ameuagiza uongozi wa Halmashauri wa Jiji la Dodoma kuhakikisha wanaweka mikakati bora ya usimamizi  na uendeshaji wa miradi hiyo ili  kulinda ubora wa stendi na soko ili kuepusha lawama zitakazojitokeza wakati wa kutoa huduma katika maeneo hayo.

“Mkurugenzi wa Jiji la Dodoma Godwin Kunambi hakikisha unaweka mikakati mizuri ya uendeshaji na usimamizi wa miradi hii ili kupunguza malalamiko kwa wafanyabishara na watoa huduma katika eneo hili na pia kulinda miundombinu na usafi wa maeneo hayo” Ameagiza Mhe. Jafo

Ameeleza kuwa Serikali imetumia gharama kubwa katika ujenzi wa Miradi hiyo, lengo likiwa ni kuhakikisha wafanyabiashara wa Mkoa wa Dodoma wanakuza uchumi na kujiongezea kipato, hivyo ni wajibu wa Halmashauri kuhakikisha wanaweka mikakati bora ya jinsi ya kuendesha miradi hiyo.

Amemtaka kuhakikisha Halmashauri inakusanya mapato kwa wakati lakini  waangalie gharama rahisi watakaotoza wananchi ili kupunguza lawama zinazoweza kujitokeza katika uendeshaji wa miradi hiyo.

“Halmshauri ya Jiji la Dodoma kusanyeni mapato ili kuongeza uchumi lakini watozeni wafanyabishara gharama inayokubalika, isijesababisha miradi hii kukimbiwa na wananchi wakiogopa gharama zinazotolewa na Halmashauri ya Jiji na kuifanya kukaa bila kutumiwa kwa lengo lililokusudiwa na Serikali”amesema Mhe Jafo

Hata hivyo, Mkurugenzi wa Halmashauri ya Jiji la Dodoma Godwin Kunambi amesema kuwa tayari Ofisi yake imeunda kamati maalumu kutoka Wizara ya fedha, Ofisi ya Rais TAMISEMI, Ofisi ya Mkuu wa Mkoa, Ofisi ya Mkuu wa Wilaya na Ofisi ya Jiji kwa kuweka uwazi na timu imeanza kazi,kamati ikimaliza kazi yake watatangaza watu waje kupangisha na  kampuni ya jiji la Dodoma City Investment Company itakuja  kufanya kazi ya operesheni.

Na. Angela Msimbira OR-TAMISEMI