Imarisheni uadilifu na utatuzi wa kero za wananchi – Mhe. Batilda Burian

Imewekwa tar.: August 14th, 2024

Na OR TAMISEMI, Tanga 

Mkuu wa Mkoa wa Tanga Mheshimiwa Batilda Burian amefungua mafunzo kwa Maafisa Tarafa na Watendaji wa Kata Mkoa wa Tanga na kuwataka kuwa waadilifu na kutatua kero za wananchi kwa wakati.

Kauli hiyo imetolewa leo tarehe 14 Agosti, 2024 na Mkuu wa Mkoa wa Tanga Mheshimiwa Batilda Burian katika shule ya sekondari Galanos ya Jijini Tanga wakati akifungua mafunzo kwa Maafisa Tarafa na Watendaji wa Kata ambapo amewaagiza kuwa waadilifu katika kusimamia mali ya Umma, miradi ya maendeleo na kutatua kero za wananchi kwani inasaidia hata kuwainua wananchi kiuchumi. 

“sisi kama Viongozi  tusipotumia juhudi kwa uwekezaji mkubwa uliofanyika ili sasa tufanye shughuli zetu za huduma kuhakikisha tunaweka mazingira wezeshi, shughuli zetu zinafanyika na kero za wananchi zinatatuliwa hata tukisema Tanga tuna pato la uchumi wa mtu kwa mwaka umetoka Shilingi 2,200,000 hadi 3,000,000 huyu mtu wa kawaida aseme kweli naiona hiyo na wenye nafasi ya kumwezesha ni sisi” alisema Mheshimiwa Batilda Burian.

Mheshimiwa Burian amesema bado zipo changamoto zinazoathiri utoaji wa huduma kwa wananchi katika ngazi ya Kata na Tarafa zinazotokana na utendaji kazi wa kila siku wa watendaji hao usioridhisha kwani viashiria ni kuwepo kwa migogoro ya kiutendaji kati ya Wataalam na viongozi katika ngazi ya kijiji, Kata na Tarafa.

Aidha, ametolea mfano wa mgogoro wa ardhi kati za Halmashauri ya Wilaya ya Korogwe na Lushoto ambapo timu nzima ya mkoa ilihusishwa kwenda kutatua mgogoro ambao ungeweza kwisha bila ya kuitisha uongozi wa mkoa jambo ambalo limepoteza muda na fedha.

Naye Bw. Ibrahim Minja Mkurugenzi Msaidizi Idara ya Tawala za Mikoa Ofisi ya Rais TAMISEMI amesema mafunzo hayo ya siku mbili yanatolewa na ofisi yake kupitia Programu ya Uimarishaji wa Tawala za Mikoa na Serikali za Mitaa (Regions and Local Government Strengthening Programme-RLGSP) na kwamba mafunzo hayo yatakuwa yamekamilisha mikoa 26 yaTanzania Bara na mikoa ya Tanga na Morogoro ndiyo ya mwisho.

Kwa upande wake Mwinyimkuu Nassoro Sultan Mtendaji wa kata ya Bushiri Halmashauri ya Wilaya ya Pangani amesema mafunzo hayo yatamsaidia katika kuwahudumia wananchi kwa kutatua kero zao, kusimamia Viongozi waliopo katika ngazi za msingi kwenye eneo lake, kusimamia miradi na kuwa na uwezo wa kutambua changamoto zilizopo na kuzitatua kwenye maeneo yao badala ya kusubiri Viongozi kutoka ngazi za juu kuja kuziibua.