Hospitali ya Mabwepande yatakiwa kutoa huduma za afya ifikapo Desemba 30, 2021

Imewekwa tar.: November 24th, 2021

Na Fred Kibano, Dar es Salaam

Serikali imeagiza kukamilika kwa miundombinu ya hospitali mpya ya wilaya ya Kinondoni Mabwepande ifikapo tarehe 30 mwezi Desemba mwaka huu na kuanza kutoa huduma zote za afya kwa wananchi.

Kauli hiyo ya Serikali imetolewa na Dkt. Festo Dugange Naibu Waziri Ofisi ya Rais TAMISEMI alipofanya ziara yake mapema hii leo Jijini Dar es Salaam na kukuta hali ya kusuasua kwa ujenzi wa baadhi ya majengo mbali na Serikali kupeleka zaidi ya shilingi Bilioni tatu kwa awamu tofauti.

Dkt. Dugange amesema haiwezekani kwa takribani miaka nane sasa hospitali hiyo iwe haijakamilika na wananchi wanapata shida ya kupata huduma za afya mbali na maeneo hayo wakati Serikali imewekeza fedha kwenye hospitali hiyo shilingi Bilioni tatu na milioni mia nne.

Dkt. Dugange amewaagiza watendaji wa Mkoa wa Dar es Salaam na Manispaa ya Kinondoni kuhakikisha majengo mama na mtoto, maabara, jengo la mionzi, chumba cha kuhifadhia maiti, na jengo la upasuaji, jengo  la kutolea dawa na stoo ya dawa kukamilika mapema iwezekanavyo na kuanza kazi ifikapo Tarehe 30 Desemba, 2021.

“majengo yote ya mama na mototo, wagonjwa wa nje, huduma za upasuaji na kulaza wagonjwa miundombinu yote ikamilike kwa wakati na muanze kutoa huduma zote ifikapo Desemba 30, mwaka 2021”

Aidha, amemwagiza Mkurugenzi wa Manispaa ya Kinondoni kuchukua hatua za kinidhamu kwa wale wote walioshindwa kusimamia ujenzi wa jengo la ghorofa nne la hospitali ya wilaya Mabwepande kwa kuwa na kasoro zinazofanana kuanzia ghorofa ya kwanza hadi ya nne na wasimamizi wa kazi hiyo wapo na pia kuhakikisha taarifa ya kutoa adhabu kwa watumishi hao inawasilishwe Ofisi ya Rais TAMISEMI mara moja.

Kwa upande wake Dkt. Rashidi Mfaume ambaye ni Mganga Mkuu wa Mkoa wa Dar es salaam amesema maelekezo yote wamezingatia na kwamba kwa sasa wasimamizi wa ujenzi wa hospitali ya Mabwepande watapiga kambi katika hospitali hiyo mpya yenye hadhi ya Wilaya ili kukamilisha majengo yote na kuanza kutoa huduma maramoja ifikapo mwishoni mwa mwezi Desemba 2021.

Naye Mganga Mkuu wa Manispaa ya Kinondoni Dkt. Samwel Laizer amesema wamezingatia maelekezo yaliyotolewa na kwamba mwishoni mwa mwezi Desemba 2021 wataanza kutoa huduma za afya maramoja.