HATI FUNGANI YA MIUNDOMBINU YA BARABARA YALETA NEEMA KWA MAKANDARASI WAZAWA.

Imewekwa tar.: December 29th, 2024

Waziri wa nchi, Ofisi ya Rais - TAMISEMI Mhe. Mohamed Mchengerwa amesema kuwa lengo kuu la kuanzishwa Hatifungani ya Miundombinu ya Barabara za Wilaya (Samia Infrastructure Bond) ni kuwasaidia Makandarasi wazawa kukabiliana na changamoto ya kifedha wanazokutana nazo na kuwawezesha kushiriki katika Miradi mikubwa ya Miundombinu ya Barabara.

Kauli hiyo ameitoa wakati wa hafla ya uzinduzi wa Hatifungani ya Miundombinu ya Barabara za Wilaya (Samia Infrastructure Bond) uzinduzi uliofanywa na Makamu wa Rais, Mhe. Dkt. Philip Mpango katika Ukumbi wa Mlimani City jijini Dar es Salaam.

Mhe. Mchengerwa amesema kuwa wakati alipoteuliwa na Mhe. Rais kushika wadhifa wa Waziri wa Nchi, Ofisi ya Rais - TAMISEMI na kusimamia eneo la TARURA aliona baadhi ya mambo hayakuwa yakienda vizuri akitolea mfano wa baadhi ya Miradi yenye thamani ya bilioni tano hadi kumi kushuhudiwa kufanywa na wakandarasi kutoka nje ya nchi kazi ambazo zingeweza kutekelezwa na Makandarasi wazawa.

"Mimi na timu yangu tukaona tufanye utafiti ni namna gani tunaweza kuwanyanyua wakandarasi wazawa na wao washiriki moja kwa moja katika utekelezaji wa Miradi mbalimbali ambayo inaweza kuleta manufaa makubwa Kwa Taifa letu" Alibainisha Mhe. Mchengerwa

Mhe. Mchengerwa ameendelea kufafanua kwa kueleza kuwa huo ni utaratibu wa kifedha ambao utatoa fursa kwa Makandarasi wazawa kupata fedha za kutosha ambazo zitawezesha kutekeleza miradi kwa ufanisi na kulipwa kwa wakati kulingana na matakwa ya mikataba ya kazi wanazofanya Ili kuimarisha ustawi wa Makandarasi na ustawi wa uchumi wa Taifa letu Kwa njia endelevu.

"Mhe. Makamu wa Rais, Hatifungani hii inaishi falsafa ya aliyosema Mahtama Gandhi kuwa ‘Maendeleo ya kweli ya Jamii hupimwa kwa jinsi yanavyoboresha maisha ya watu"

" Leo ni siku muhimu sana katika historia ya Taifa letu kwani tukio la leo linaleta faraja kwa Watanzania wengi hasa Makandarasi." Aliongeza Mhe.Mchengerwa

" Hatifungani hii ni sehemu makini katika juhudi za kuhimarisha miundombinu yetu hasa barabara za Wilaya zinazosimamiwa na TARURA chini ya Ofisi ya Rais - TAMISEMI ambazo ni nguzo muhimu za maendeleo ya Taifa letu". Amesema

Amesema Serikali imekuwa ikifanya juhudi kubwa za kutatua changamoto za miundombinu hasa kupitia Makandarasi wazawa na hatua hii ya uzinduzi ni ishara ya mafanikio ya juhudi za utekelezaji wa maelekezo ya kutatua kero mbalimbali wanazokabiliwa Makandarasi 

Akizungumza kwa niaba ya Waziri wa Ujenzi, Naibu Waziri, Wizara ya Ujenzi Mhe. Mhandisi Godfrey Kasekanya amesema kuwa wao kama Wizara ya Ujenzi yenye dhamana ya ujenzi wanatambua changamoto kubwa ya mtaji ambayo wakandarasi wazawa wanakutana  nayo katika kutekeleza miradi mbalimbali ya Serikali iwe ni miradi iliyo chini ya TARURA au TANROADS na kusisitiza kuwa uzinduzi wa hatifungani hii ya ‘Samia Infrastucture Bond’ ni sehemu ya juhudi za kutatua changamoto hizi na utasaidia sana wenzetu wa TARURA katika kukamilisha miradi kwa wakati.

"Tukiwa wadau wenza katika sekta hii ya miundombinu, hatuna budi kufurahia mafanikio haya tukiamini kuwa tunahitaji TARURA na TANROADS zenye ufanisi kwa ajili ya maendeleo endelevu ya sekta ya miundombinu".Mhe. Kasekanya.