Halmashauri zapunguza utegemezi kwa asilimia 15

Imewekwa tar.: February 25th, 2022

Katibu Mkuu Ofisi ya Rais Tawala za  Mikoa na Mamlaka za Serikali za Mitaa Prof. Riziki Shemdoe  amesema kuwa  Mamlaka za Serikali za Mitaa  zimepiga hatua katika  kupunguza   utegemezi  wa fedha kutoka Serikali Kuu   kutoka asilimia 8  hadi kufikia asilimia 15.

Mwaka  2016/2017, Mamlaka  za Serikali za Mitaa zilikuwa na  uwezo wa kujitegemea zenyewe  kwa  asilimia 8 kupitia mapato ya ndani  huku asilimia 92 zikitegemea fedha kutoka Serikali kuu na hadi kufikia mwaka  2020/2021 Mamlaka  hizo  zimepiga hatua na kujitegemea  zenyewe kwa asilimia 15.

Hayo yamebainishwa  leo jijini Dodoma katika kikao kazi cha kujadili utekelezaji wa kazi za program ya Maboresho ya Usimamizi wa Fedha za Umma (PFMRP) msimu wa tano.

Prof. Shemdoe amesema kuwa hayo yote ni matokeo  ya ushirikiano kati ya  Serikali ya Jamhuri ya Muungano wa Tanzania  na wadau wa maendeleo ambao ni  Shirika la Maendeleo  la Uingereza, Norway na Denmark.

Amesema programu hiyo pia imesaidia kupunguza hoja za ukaguzi na umeimarisha ongezeko la makusanyo ya mapato ya ndani.

"Japo bado Mamlaka za Serikali za Mitaa zinategemea fedha kutoka Serikali kuu katika kuendesha shughuli zake  kuna uwezekano mkubwa  Mamlaka hizo zikaondokana na  hali ya utegemezi kutoka  Serikali Kuu na zikajiendesha zenyewe kupita mapato ya ndani." amesema Prof. Shemode

Aidha, amewashukuru  wadau wa maendeleo kwa ushiriki wao katika kuleta maboresho hasa katika ukusanyaji wa mapato kwani ushiriki wao umeimarisha usimamizi na udhibiti wa matumizi ya fedha katika Mamlaka za Serikali za Mitaa.

Hata hivyo, Profesa Shemdoe amesema mkakati wa serikali ni kushirikisha wadau wa maendeleo ili kuja na programu nyingine ambayo itajumuisha mkakati wa kupumguza matumizi ya fedha mbichi.

Naye Mkuu  wa Kitengo cha Masuala ya Kisiasa na Kiutawala kutoka Ubalozi wa Uingereza Bw. Laurence Wilkes ameishurukuru Ofisi ya Rais-TAMISEMI kwa  kushirikiana pamoja katika kuimarisha mifumo ya usimamizi wa fedha za Umma  katika  Mamlaka za Serikali za Mitaa.