Halmashauri ya Jiji la Dodoma yatumia mapato ya ndani kufanya uwekezaji

Imewekwa tar.: December 10th, 2020

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo (Mb) ameipongeza timu ya Manejimenti ya Jiji la Dodoma kutumia mapato yake ya ndani na kufanya uwekezaji wa ujenzi wa Hoteli, Jijini Dodoma.

Akikagua maendeleo ya ujenzi wa Hoteli hiyo leo Waziri Jafo amesema hakuna Halmashauri ambayo imefanya uwekezaji mkubwa kwa kutumia mapato yake ya ndani kama ilivyofanya Halmashauri ya Jiji la Dodoma.

“Katika Halmashauri zangu 185 hakuna Halmashauri iliyotumia mapato yake ya ndani kufanya uwekezaji mkubwa  wa ujenzi wa Hoteli yenye gorofa kumi  na moja,  inanionyesha kuwa kila halmashauri ikiamua inaweza  kuwekeza na kupunguza utegemezi.”amesisitiza Waziri Jafo

Ameziagiza Halmashauri zote nchini kubuni vyanzo vya mapato kwa kufanya uwekezaji ili ziweze kujiongezea mapato na kuacha kutegemea ruzuku kutoka Serikalini hali ambayo inakwamisha maendeleo kwa jamii na kutokufikia malengo ya Halmashauri.

‘Halmashauri zinatakiwa kuacha kuwa ombaomba na kushindwa kujiendesha kutokana na ubunifu hafifu wa miradi ya maendeleo hivyo naziagiza Halmashauri  kubuni mbinu mbadala za uwekezaji ili kujiongezea kipato na kuweza kujiendesha zenyewe bila ruzuku ya Serikali.

Waziri Jafo amesema kiasi cha shilingi bilioni 1.2 zitakusanywa mara baada ya kukamilika kwa Hoteli hiyo ambapo fedha hizo ni sawa na bajeti ya mwaka mzima ya Halmashauri ya Wilaya ya Chamwino.

Wakati huohuo, Mkurugenzi wa Jiji la Dodoma Bw. Joseph Mafuru amesema mradi wa ujenzi wa Dodoma City Hotel unagharimu zaidi ya shilingi bilioni 9. 9 na unajengwa chini ya mkandarasi M/S STECOL CORPORATION, kutoka Dar-es-salaam