Halmashauri tengeni asilimia 40 kwenye miradi, asilimia 10 kwenye vikundi kama inavyosema sheria - Dkt. Dugange

Imewekwa tar.: December 29th, 2021

Na Fred Kibano, Shinyanga

Naibu Waziri Ofisi ya Rais TAMISEMI Dkt. Festo Dugange amesema Serikali ilikwishapitisha sheria ya kuzitaka Halmashauri zote nchini kutenga asilimia 40 ya makusanyo ya mapato yao kwa ajili ya miradi ya maendeleo lakini pia kutenga fedha za makusanyo yao asilimia 10 kwa ajili ya kutoa mikopo kwa vikundi vya Wanawake, Vijana na Watu wenye ulemavu lengo likiwa kupeleka maendeleo kwa wananchi na Mamlaka husika.

Akiongea na Sekretarieti ya Mkoa wa Shinyanga mwishoni mwa wiki Dkt. Dugange ameupongeza mkoa huo kwa kuenga mapato yao ya ndani asilimia 40 kwa asilimia 92 hadi mwishoni mwa mwezi Novemba na kutaka mikoa mingine iige mkoa wa Shinyanga kwa kufikia malengo waliyojiwekea kwa kila robo mwaka.

“mara nyingi baadhi ya Halmashauri zimekuwa zikijisahau kupeleka asilimia 40 kwenye miradi ya maendeleo na Serikali imekuwa ikisisitiza ni lazima zile fedha ziende kwenye miradi yenye tija kwa wananchi”  alisema Dkt. Dugange.

Ameitaja baadhi ya miradi kwa sekta kuwa ni pamoja na barabara, elimu, afya, maji na mingineyo ambayo inaigusa jamii moja kwa moja.

Kuhusu mikopo ya vikundi vya Wanawake, Vijana na Watu wenye ulemavu ameziasa Halmashauri zote kutoa mikopo yenye tija kwa vikundi vichache ili viweze kuimarika kiuchumi na kuweza kurejesha fedha kwa wakati ili vikundi vingine vilivyofikia vigezo viweze kukopa pia kuliko kutoa fedha kidogo kwenye vikundi vingi ambayo haiweza kuwainua kiuchumi.

“jambo la msingi ni kuhakikisha sasa tunaboresha utoaji wa mikopo ya asilimia 10 yenye tija, ni vyema ukawa na vikundi vichache lakini ukavikopesha fedha ambayo kimsingi itawawezesha kutoka hatua moja kwenda hatua nyingine”  alisema Dkt. Dugange.

Kwa upande wake Mkuu wa Mkoa wa Shinyanga Mheshimiwa Sophia Mjema amesema yeye pamoja na viongozi wenzake watasimamia fedha za miradi ya maendeleo zikiwemo zile za asilimia 40 na zile za mikopo ya vikundi vya Wanawake, Vijana na Watu wenye ulemavu.

“tutahakikisha tunazisimamia fedha hizi vizuri na tutaendelea kuwaelekeza watu wetu” alisema Mheshimiwa Mjema.

Naye Kaimu Katibu Tawala Mkoa wa Shinyanga Bwana Chila Moses amesema Halmashauri za Mkoa wa Shinyanga zimeendelea kupeleka fedha zinazotokana na mapato ya ndani kwa vyanzo visivyolindwa kwenye miradi ya maendeleo kwa wakati.

“hadi kufikia Novemba 30, 2021 kiasi cha shilingi 3,519,758,307 zimepelekwa kwenye miradi ya maendeleo katika sekta ya elimu, afya, uwezeshaji wananchi kuichumi na barabara ambayo ni sawa na asilimia 92 ya makusanyo halisi ya shilingi 8,843,261,034.38” alisema Bwana Moses.

Aidha, Bwana Moses amesema katika  kipindi cha Julai hadi Novemba, 2021 mkoa wa Shinyanga umetoa mikopo isiyo na riba shilingi 93,846,247 kati ya shilingi 960,815,258 sawa na asilimia 97.19 ya makusanyo halisi kwa vikundi vya wanawake, vijana na watu wenye ulemavu.