Halmashauri 5 zanufaika na mfuko wa kutatua changamoto ya uhifadhi wa wanafunzi mashuleni

Imewekwa tar.: October 2nd, 2021

HALMASHAURI za Wilaya tano nchini zimesaini makubaliano ya kutekeleza mradi wa changamoto ya uhifadhi wa Wanafinzi ili kuondokana na tatizo la mdondoko kwa wanafunzi.

Halmashauri hizo ni Bahi, Chamwino, Ruangwa, Kilwa na Liwale ambazo zitatekeleza mradi huo wa majaribio na unasimamiwa na taasisi ya Price Water Coopers (PWC) kwa ufadhili wa Dola za Marekani 500,000 kutoka Shirika la Maendeleo la Korea ya Kusini (KOICA).

Akizungumza jana kuhusu mradi huo, Katibu Mkuu, Ofisi ya Rais, Tawala za Mikoa na Serikali za Mitaa Prof.Riziki Shemdoe, amesema Halmashauri 20 zilishiriki kuandaa andiko la mradi huo lakini baada uchambuzi wa maandiko hayo zilichaguliwa Halmashauri hizo tano.

Alisema mradi huo unalenga kubaini vikwazo vinavyosababisha wanafunzi wengi wa msingi na Sekondari kutomaliza masomo yao na kutafutia ufumbuzi.

“Niwapongeze sana kwenye hatua hii ya awali ya kushinda kuwa miongoni mwa Halmashauri tano zilizochaguliwa, nawashukuru sana wenzetu wa KOICA ambao ni wadau wa maendeleo bwana Kyucheol Eo ambaye ndiye Mkurugenzi Mkaazi wa KOICA, amekuja kushuhudia kitendo hichi cha kusaini makubaliano haya ya kutekeleza mradi huu,”alisema.

Prof.Shemdoe alishukuru KOICA kwa kusaidia Tanzania kwenye sekta ya elimu kwa watoto waliopo Shule ya Msingi na Sekondari ambao wanapata vikwazo na kusababisha kufikia mwisho wa masomo yao.

“Kkwenye safari ya elimu kuna Shule za Msingi wanaanza vizuri kabla ya kufikia darasa la saba wanaanguka njiani, kuna changamoto nyingi wengine wanapata mimba wengine wanakuwa na sababu mbalimbali”

“Hivyo hivyo kwa wanafunzi wanaoanza kidato cha kwanza kwa mfano mwaka huu tunategemea kuwa na wanafunzi milioni moja ambao wanaenda kuanza kidato cha kwanza tunatarajia baada ya miaka minne tuwaone wanamaliza kidato cha nne, lakini kwa bahati mbaya wengine wanaweza wakadondoka hapo njiani alisema.

Alisema lengo ni kupunguza mdondoko kwa wanafunzi ili wote wanaoanza safar ya masomo waweze kumaliza salama.

“Kwa niaba ya serikali kama wasimamizi wakuu wa Mamlaka za Serikali za Mitaa na Elimu kwenye mamlaka hizi, kwa niaba ya Wizara ya Elimu tunapenda kuwahakikishia KOICA, ushirikiano wa kutosha katika kutekeleza mradi huu,”alisema.

Aliwataka Wakurugenzi wa Halmashauri hizo kutekeleza mradi huo kwa kuwa utakapofanya vizuri utapanua wigo kwa Halmashauri zingine kupata mradi huo.

“Kuna Mamlaka za Serikali za Mitaa 184, kama jitihada hizi zitafikia mamlaka zote tutaweza kukabiliana na mdondoko huu kwa kiwango kikubwa” alisema.

Alitoa wito kwa wazazi kuzuia mdondoko wa wanafunzi na kwamba afua zinazofanywa na serikali ni saidizi lakini wazazi ndio wanawajibu wa kuondoa hali hiyo.

“Hii itatusaidia sana kila mtoto anapata haki yake ya kupata elimu nchini, Rais ametuhakikishia kwamba matatizo ya elimu yanashughukiwa, ametoa fedha za ujenzi wa madarasa 15,000, tumuunge mkono Rais wetu kama ambavyo wadau wenzetu wa maendeleo wameliona hili na wanamuunga mkono,”alisema.

Naye, Mkurugenzi Mkaazi wa KOICA, Kyucheol Eo, alisema miongoni mwa matatizo ya mdondoko ni wanafunzi kutembea umbali mrefu.

“Tanzania imefanya jitihada mbalimbali na kuongeza udahili wa wanafunzi, tutaendelea kuwa nanyi kwenye utekelezaji wa mradi wa EP4R, kuna mradi mwingine ambao januari 2022 baadhi ya Halmashauri zitanufaika na mradi huu,”alisema.

Kwa upande wake, Mkurugenzi wa PWC, Nelson Msuya, alisema wao wamepokea fedha na kupeleka kwenye Halmashauri hizo ili mipango yao itekelezwe inavyotakiwa.

“Tunaomba sana fedha hizi zikafanye kazi iliyoombewa, tunaamini kutakuwa na utaratibu mzuri wa kuweka kumbukumbu za utekelezaji wa mradi huu,miradi hii itafanyiwa ukaguzi tunaomba ilete matokeo chanja,”alisema.