GIS itasaidia uendelezaji wa miradi ya maendeleo katika Mamlaka za Serikali za Mitaa Nchini

Imewekwa tar.: May 6th, 2019

Imeelezwa kuwa kuunganishwa kwa Mfumo wa ukusanyaji wa  taarifa za Kijografia (GIS)  na mfumo wa ukusanyaji wa mapato wa kielektroniki katika Mamlaka za Serikali za Mitaa (LGRCIS) kutasaidia kuwa na taarifa sahihi za ukusanyaji wa Mapato katika Mamlaka za Serikali za Mitaa.

Hayo yamesemwa na Mshauri na Mtaalam wa Mfumo wa Ukusanyaji wa Taarifa za Kijografia (GIS) kutoka Mradi wa Uendelezaji Miji Tanzania (TCSP} ulio chini ya Ofisi ya Rais Tawala za Mikoa na Serikali za Mitaa Bi. Grace Kyaruzi wakati wa kufanya majumuisho ya ziara ya kikazi ya ufuatiliaji wa Miradi inayofadhiliwa na Benki ya Dunia Jijini Mbeya.

Amesema kuwa kuunganishwa kwa mifumo hii kutasaidia kuleta mapinduzi makubwa katika kuhakikisha Mamlaka za Serikali za Mitaa zinakusanya mapato na kuwa na taarifa zote zilizoko katika ardhi ambazo zitasaidia viongozi wa Serikali kufanya maamuzi katika kutekeleza miradi mbalimbali ya maendeleo nchini.

Amesema kuwa mifumo hii  italeta mabadiliko katika suala zima la ukusanyaji wa mapato katika Halmashauri zote nchini, Pia haitasaidia  ukusanyaji wa mapato pekee  bali utakuwa mfumo maalum  wa kupata taarifa nyingi zitakazosaidia kutenda vyema katika utendaji kazi  katika Mamlaka za Serikali za Mitaa.

Bi. Kyaruzi amewataka viongozi wa Jiji la Mbeya kuhakikisha wanatoa elimu kwa makundi mbalimbali ya Mkoa huo ili waweze kupokea mfumo huo ambao utasaidia kupunguza changamoto katika kuendeleza miradi mbambali ya maendeleo katika Mamlaka za Serikali za Mitaa.

“Kutumia mfumo wa GIS kutasaidia viongozi  kufanya maamuzi stahiki katika kutekeleza miradi ya maendeleo kwenye  Mamlaka za Serikali za Mitaa Nchini hivyo ni wajibu wa Halmashauri ya Jiji la Mbeya kuhakikisha elimu inatolewa kwa wananchi juu ya umuhimu wa ukusanyaji wa taarifa  mbalimbali katika maeneo yao ili kuwa na kanzi data (Database)” Anafafanua Bi. Kyaruzi

Wakati huohuo Mwekahazina wa Halmashauri ya Jiji la Mbeya Bw. Amede Ng’wanidako amesema kuwa  Halmashauri ya Jiji la Mbeya imeweza kuongeza mapato yake kwa asilimi 75  jambo ambalo limetokana na juhudi na kufanya kazi kwa weledi katika kuhakikisha Mapato yanakusanywa  kwa wakati.

Amesema Jiji hilo limejiwekea mkakati wa kuboresha ukusanyaji wa mapato kwa kutoa elimu kwa wafanyabiashara  kuhusu umuhimu wa kulipa kodi  na kuendelea na zoezi  la ukaguzi wa vyanzo vya mapato.

Aidha amesema kuwa watatumia takwimu (data) za TRA katika kukadilia ushuruwa huduma  na fomu  za makadirio”Deceleration form” kwa wateja wasiotuza  hesabu.

Na.Angela Msimbira OR-TAMISEMI MBEYA