Fedha za Wafadhili zifanye kazi iliyokusudiwa - Dkt. Charles Mahera

Imewekwa tar.: January 29th, 2024

OR - TAMISEMI

 Serikali imeyataka mashirika binafsi ya afya kutumia kwa ufanisi fedha za wafadhili zinazotolewa kwa lengo la kugharamia uendeshaji wa miradi mbalimbali inayotekelezwa na mashirika hayo ikilenga kuboresha huduma za afya na maisha ya watanzania kwa ujumla.

Hayo yameelezwa katika kikao cha kimkakati kati ya Idara ya Afya Ofisi ya Rais, Tawala za Mikoa na Serikali za Mitaa – TAMISEMI na wadau wa afya  hapa nchini kilichofanyika Januari 29, 2024 Jijini Dodoma.

Akifungua kikao hicho Naibu katibu Mkuu OR – TAMISEMI anayeshughulikia afya Dkt. Charles Mahera, ameonya kuwa matumizi ya fedha za wafadhili kwenye shughuli tofauti na zilizoelezwa wakati wa maombi ya fedha hizo, ni hatua inayolenga kukamilisha ripoti kwa ajili ya wafadhili na siyo kubadili maisha ya walengwa kama lilivyo lengo la Serikali.

 “ Tunapata rasilimali kwa taabu sana, lakini baadhi ya wadau wetu wanapopata rasilimali hizo na hasa rasilimali fedha hawaendi kubadilisha maisha ya watanzania na badala yake wanajali sana kusainisha watu na kukamilisha taarifa za wafadhili, hakuna uwazi wa matumizi ya fedha” amesema Dkt. Mahera

Ameongeza kuwa “chochote wanachokipata, kitumikr vizuri na ili kiweze kutumika  vizuri lazima mpitie kwenye muundo wetu wa utendaji kazi, hii itatusaidia sisi na ninyi kuelekezana sehemu yenye uhitaji mkubwa zaidi wa huduma mnayotaka kuitoa kwa ajii ya ufanisi wa mradi na kuboresha afya za watu wetu”

Awali akiongea katika kikao hicho Mkurugenzi wa Huduma za Afya, Lishe na Ustawi wa Jamii Ofisi ya Rais – TAMISEMI Dkt. Rashid Mfaume amesema dhamira ya kikao hicho ni kubadilishana taarifa, kuimarisha ushirikiano na kuweka mikakati ya pamoja ili kufikia malengo yanayokusudiwa katika sekta ya afya nchini.