DKT. MAGEMBE APONGEZA UTEKELEZAJI MIRADI YA AFYA LINDI NA MTAMA OR - TAMISEMI

Imewekwa tar.: July 25th, 2022

Naibu Katibu Mkuu (Afya) Ofisi ya Rais, Tawala za Mikoa na Serikali za Mitaa Dkt.  Grace Magembe amepongeza kasi ya utekelezaji wa miradi katika Halmashauri ya Wilaya ya Lindi na Mtama na kuwasisitiza kuendeleza kasi hiyo kwa miradi mingine inayoendelea kutekelezwa katika Halmashauri hizo.

Dkt. Magembe ameipongeza Manispaa ya Lindi kwa  kuimarisha usimamizi  wa fedha na kuwa  wabunifu  katika utekelezaji   ambapo kwa kutumia Shilingi Mil. 250 walizopewa na Serikali  kujenga  jengo la wagonjwa wa nje, maabara na kichomeo taka katika kituo cha Afya Ng’apa kwa kutumia  fedha hiyo hiyo wameongeza  mnara wa tenki la maji na  shimo la kutupia kondo la nyuma.

Hayo yamebainishwa tarehe 25 Julai 2022 baada ya ziara yake ya kutembelea na kukagua utekelezaji wa ujenzi wa miundombinu ya kutolea huduma za Afya katika Halmashauri hizo Mkoani Lindi.

“Nimeona namna ambavyo kamati ya usimamizi  wa ujenzi, ofisi ya Mhe. Mkuu wa Wilaya,  Ofisi ya Mkurugenzi na wananchi mnavyoshirikiana kutekeleza na kusimamia  miradi, hongereni  sana na endeleeni na utekelezaji ili miradi iishe kwa wakati na kuanza kutoa huduma” Dkt. Magembe

Aidha, amempongeza Mkurugenzi wa  Halmashauri ya Wilaya ya Mtama kwa kuwa mbunifu katika  kusimamia matumizi ya fedha  katika utekelezaji wa ujenzi wa miundombinu ya Afya ya Hospitali ya Wilaya ya Mtama na kuagiza baadhi ya huduma za Afya  zianze kutolewa  kwakuwa  majengo tayari yamekamilika.

Awali akipokea taarifa ya utekelezaji wa huduma za Afya katika Halmashauri   ya  Wilaya ya  Mtama, Dkt Magembe amemuagiza  Mkurugenzi  wa Halmashauri hiyo kutekeleza afua za lishe na Ustawi wa Jamii  pamoja na kendelea  kuhamasisha wananchi kujiunga na mfuko wa Bima ya Afya ya Jamii ambapo  kwa sasa  uandikishaji upo 15% tu.

Kupitia taarifa hiyo ambayo imeonesha   kiwango cha  maambukizi ya malaria bado kiko juu katika Halmashauri ya Mtama , Dkt. Magembe amemtaka Mkurugenzi kujikita katika kuua mazalia ya mbu na kuhamasisha wananchi kufanya usafi wa mazingira  ili kuondoa mazalia ya mbu yanayosababisha maambukizi ya ugonjwa wa Malaria.

Manispaa ya Lindi imepokea  shilingi Mil 500 kwaajili ya ujenzi wa Kituo cha Afya Nga’apa,   Halmashauri ya Mtama imepokea  zaidi ya Bil. 3 kwaajili ya uendelezaji wa hospitali ya Halmashauri.