Dkt. Gwajima aja na mwarobaini wa upotevu wa dawa nchini

Imewekwa tar.: August 12th, 2020

Serikali  imeiagiza Mikoa yote nchini kufanya ukaguzi mara moja katika vituo vyote vya kutolea huduma za afya ngazi ya msingi ili kujua mfumo na mnyororo wa ugavi wa dawa, vifaa tiba ,vitendanishi na kuchukua hatua stahiki zikiwemo za kuziba mianya ya wizi.

Kauli hiyo imetolewa jana na Naibu Katibu Mkuu, Ofisi ya Rais Tawala za Mikoa na Serikali za Mitaa (TAMISEMI) anayeshughulikia Afya, Dkt. Dorothy Gwajima  katika Kikao kazi cha tathmini ya taarifa ya utekelezaji wa ukaguzi wa mnyororo wa ugavi wa dawa, vifaa tiba na vitendanishi pamoja na mapato ya uchangiaji katika vituo vya kutolea huduma za afya Mkoani Simiyu.

Dkt. Gwajima ameeleza kuwa kuna baadhi ya watu wamegeuza Serikali kuwa shamba la bibi kwamba kila mtu atafanya anavyojisikia huku watanzania wanyonge wakitaabika kwa kukosa dawa wanapokwenda kwenye vituo vya kutolea huduma za afya nchini.

“Naagiza  uchunguzi huo ufanyike ndani ya miezi mitatu na kuleta taarifa ifikapo 15 Oktoba, 2020 ili kujua nini kinaendelea katika vituo vyetu, hatua gani zimechukuliwa ngazi ya Halmashauri na Mkoa na zipi zichukuliwe ngazi ya kitaifa kulingana na matokeo ya zoezi hilo”, ameelekeza Dkt. Gwajima.

Dkt. Gwajima amesema kuwa, sharti ukaguzi huo ufanywe na wataalamu wa ukaguzi na uchunguzi yaani wakaguzi wa ndani (CIA) mkoa, halmashauri na maafisa ugani wa ngazi husika kama ilivyofanyika hapa Simiyu.

Amewataka Waganga Wakuu wa Mikoa na Halmashauri kutoa ushirikiano stahiki kwa timu hizi za ukaguzi ili kuweza kukamilisha zoezi hilo kakamilifu.

“Makatibu Tawala wa Mikoa na Wakurugenzi wa Halmashauri muwawezeshe Wataalamu na Wakaguzi. Wakuu wa Mikoa na Wilaya fuatilieni utekelezaji kama ambavyo Mhe Mkuu wa Mkoa wa Simiyu alivyokuwa mstari wa mbele kushirikiana na Katibu Tawala wake na sasa wameona matunda kuwa kumbe inawezekana dawa, vifaa tiba na huduma za vipimo kuwepo na vituo vikaongeza mapato ya uchangiaji hadi zaidi ya mara 4 ndani ya miezi sita tu, Simiyu wamethubutu, wameweza na wameiona tija hivyo wengine chukueni hatua kwa kujifunza toka kwao”, Amesisitiza Dkt Gwajima.

Pia Dkt. Gwajima amebainisha  kuwa katika fedha na mali yoyote ya Serikali hakuna mchezo wa mzaha hivyo kila mtumishi mwenye dhamana ya kusimamia anao wajibu wa kutoa taarifa ya matumizi.

Katika hatua nyingine Dkt. Gwajima amesema kuwa ni lazima yapatikane mapinduzi makubwa na ya haraka katika kutunza rasilimali za afya, haiwezekani Serikali itoe mtaji mkubwa wa raslimali dawa, vifaa tiba na vitendanishi, mishahara, majengo, ilipe umeme na maji halafu kuwa tegemezi  wakati  takwimu za ukaguzi wa awali hapa Simiyu zinakiri kuwa inawezekana kupunguza utegemezi.

Ameitaja mikoa iliyofanya vizuri  katika kutekeleza  agizo la Ofisi ya Rais TAMISEMI  la utekelezaji wa ukaguzi wa mnyororo wa ugavi wa dawa, vifaa tiba na vitendanishi pamoja na mapato ya uchangiaji katika vituo vya kutolea huduma za afya kuwa ni Morogoro, Dar es Salaam, Mwanza, Dodoma na Arusha.

“Nawaagiza ukaguzi huo uwe endelevu na usiwe ukaguzi wa macho bali wa vitendo kwa takwimu sahihi zenye ukweli ili wachezea mali ya umma wauone ukweli kwa macho na masikio yao kuwa hatuna mchezo na hatuonei mtu ni kweli mtupu na wao ni mashahidi”, ameagiza Dkt. Gwajima.

Dkt. Gwajima amelekeza kuwa lazima kila mkoa na halmashauri uhakikishe vituo vyote vina vitendea kazi vya utunzaji mali ya umma vikiwemo leja za mali, vitabu vya kuombea na kutolea mali toka stoo (requisition and issue vouchers), kadi za kufuatilia rekodi za mali inayotoka (bin cards), risiti za dawa (prescriptions), fomu namba 2C ya mfuko wa taifa wa bima ya afya (NHIF) na watumiaji wa vifaa hivyo wanafundishwa na kuelewa na kumiliki na kutumia na kufanyiwa ufuatiliaji wa utumiaji.

Hata hivyo, Dkt. Gwajima amesema ipo mifumo mbalimbali ya kiteknolojia (TEHAMA) ambayo inatunza kumbukumbu za raslimali za afya mfano ELMIS lakini ajabu ni kuwa Wakaguzi wa Ndani na Maafisa Ugani hawajawezeshwa kuifahamu na kupewa Nywila (Password) ili wawe huru kuingia na kufuatilia ikiwemo kukagua.

Dkt. Gwajima ametoa wito wa kufungwa mfumo wa GOTHOMIS utakaosaidia  katika shughuli zao za kiutendaji na kwa ufasaha, hivyo mfumo huo  ufungwe na kila mwezi  kuwepo na taarifa  ya hatua zinazoendelea  na asiyefuata maagizo  haya atahitaji kufanyiwa ukaguzi maalum.

Naye Mkuu wa Mkoa wa Simiyu, Mhe. Anthony Mtaka amemuagiza  Katibu Tawala wa Mkoa huo Bi. Miriam Mbaga kuunda kikosi kazi kitakachofanya uchunguzi juu ya upotevu wa dawa katika halmashauri zote zilizoko katika Mkoa huo na kuja na taarifa ya kilicopatikana katika ukaguzi huo.

Na.Majid Abdulkarim, Simiyu