Dkt. Biteko azindua Namba 115 Mfumo wa M-Mama

Imewekwa tar.: March 26th, 2024

Na Fred Kibano, Dodoma

Naibu Waziri Mkuu wa Tanzania na Waziri wa Nishati Mheshimiwa Dkt. Doto Mashaka Biteko amezindua namba 115 kama suluhisho kwa dharura za wajawazito waliojifungua na Watoto wachanga nchini Tanzania.

Dkt. Doto Biteko amezindua namba hiyo leo tarehe 25 Machi, 2024 baada ya kutoa hotuba kwa niaba ya Mhe. Dkt Samia Suluhu Hassan, Rais wa Jamhuri ya Muungano wa Tanzania wakati wa hafla ya ufunguzi wa mkutano wa Kimataifa wa afyamsingi Jijini Dodoma na kusema mfumo huyo sasa upo nchi nzima na kila mtanzania akina mama na akina baba wanaweza kuutumia kuokoa maisha ya mama wajawazito na Watoto wachanga. 

“Mfumo wa usafiri wa mama wajawazito, waliojifungua na Watoto wachanga M-Mama umefika nchi nzima, akina mama 2,370,000 wanajifungua na kati ya hao akina mama 75,000 wanapata dharura zinazohitaji usafiri wa kuwapeleka kwenye vituo vinavyotoa huduma stahili kutokana na huduma ya kutaka kujifungua” alisema Mhe. Biteko.

Naibu Waziri Ofisi ya Rais TAMISEMI (AFYA) Mhe. Dkt Festo Dugange alisema hadi kufikia mwezi Februari, 2024 huduma za afyamsingi nchini vipo vituo vya kutolea huduma za afya 6,933 ambapo zahanati 5,887 vituo vya afya 874 na hospitali za halmashauri 172 ikiwa ni juhudi za Serikali ya Awamu ya Sita katika kuendelea kuhakikisha upatikanaji wa huduma bora za afya kwa watanzania 

Kuhusu utoaji wa huduma za wagonjwa wa nje (OPD) na wagonjwa waliolazwa (IPD) kwa mwaka 2023 wagonjwa waliopata huduma walikuwa milioni 26.9 walipata huduma katika vituo vya afyamsingi (OPD) na wagonjwa waliolazwa (IPD) walikuwa 854,318 wakati huduma ya mama na mtoto jumla ya wateja milioni 1.6 walijifungulia katika vituo vya kutolea huduma afya msingi na wakina mama 125,318 waliokuwa na uzazi pingamizi walifanyiwa upasuaji.

Kwa upande wake Agapinus Tax akiongea kwa niaba ya Mkurugenzi wa Vodacom Tanzania ambaye ndiye mdhamini wa Mfumo wa M-Mama amesema mwaka 2022ulifanyika uzinduzi wa Mfumo wa M-Mama kwa lengo la kuwafikia wananchi wote nchini na sasa mfumo upo nchi nzima na kwamba hiyo ni chachu ya kuwa na jamii yenye afya bora na kusisitiza kwa pamoja tunaweza.

Naye Mkurugenzi wa M-Mama Tanzania Dolorosa Duncan kutoka Pathfinder International Tanzania  amesema namba ya huduma ya dharura ya 115 ni kwa ajili ya kina mama wajawazito na waliojifungua chini ya siku 42 na watoto wachanga wenye dharura na sio akina mama waliopatwa na uchungu wa kujifungua. 

Mkurugenzi Dolorosa ameishukuru Serikali kwa kuendelea kutoa ushirikiano kwa Sekta binafsi na kuahidi kuendelea kufanya kazi kwa bidi zaidi ili mfumo huo umfikie mama mjamzito akiwa nyumbani

"kwa sasa huduma hii ya Simu ya dharura inatolewa kwa ngazi ya kituo kimoja cha afya na kingine nchi nzima ila kwa mkoa wa Shinyanga huduma hii ya dharura imefika mpaka ngazi ya jamii na sasa tunaongeza mikoa mitano ya Tanzania Bara na mkoa mmoja wa Tanzania Visiwani na malengo yetu ni kufika katika mikoa yote Tanzania," alisema Mkurugenzi Dolorosa Duncan.

Itakumbukwa kuwa Mhe. Dkt. Samia Suluhu Hassan, Rais wa Jamhuri ya Muungano wa Tanzania alizindua Mfumo wa M-Mama tarehe 6 Aprili, 2023 Jijini Dodoma ili kila mama mjamzito, aliyejifungua na mtoto mchanga waweze kupata huduma kwa wakati na kuokoa Maisha na sasa uzinduzi wa namba 115 unaonyesha Serikali ya Awamu ya Sita imejitoa katika kuboresha mifumo ya kukabiliana na dharura, kukuza mustakabalisalama na wenye afya kwa watanzania wote.