Chaula aagiza kukamilishwa boma la kituo cha afya Mkunya Newala Mji

Imewekwa tar.: June 10th, 2018

Naibu Katibu Mkuu Ofisi ya Rais TAMISEMI (Afya), Dkt. Zainab Chaula ameuagiza uongozi wa Halmashauri ya Mji Newala kumalizia boma la kituo cha afya Mkunya kabla ya kujenga maboma mapya.

Dkt. Zainab Chaula ametoa kauli hiyo wakati akikagua ujenzi na ukarabati wa kituo cha afya Mkunya kilichopo halmashauri ya Mji Newala, mkoani Mtwara hivi karibuni.

Dkt. Chaula amesema tayari kuna shilingi milioni 180 za kumalizia kituo hicho, mbali na milioni 500 zilizotengwa kwa ajili ya ujenzi, lakini kabla ya kujenga majengo mengine ni lazima kumalizia jengo kubwa la kituo hicho na miundombinu mingine ifuate ili kukikamilisha ndani ya muda mfupi lengo likiwa kutoa huduma bora za afya karibu.

“ni lazima tutengeneze huduma ziwe nzuri, milioni 180 zitumike kukamilisha boma hili, lakini zile fedha milioni 500 zitumike kujenga miundombinu mingine ili kuboresha huduma za afya”

Halmashauri ya Newala Mji ina hospitali moja ya wilaya na zahanati kadhaa lakini haina kituo cha afya na hivyo kujengwa kwa kituo hicho ni mkombozi kwa wananchi.

Wakati huo huo, Dkt. Chaula, ameongea na watumishi wa hospitali ya Mji Masasi Mkomaindo na kuwataka watumishi hao kuwa na umoja na lugha nzuri ili kuboresha mapato ya hospitali hiyo.

“hapa hakuna ushirikishaji, kila idara isimamie mapato tuwe na motisha, kila mmoja atimize wajibu wake”

Aidha, Chaula amewataka kupanda miti ya matunda katika maeneo ya hospitali mkoani Mtwara ili kuboresha lishe badala ya kupanda miti ya kivuli pekee.

Kwa upande wake, Dkt. Dorothy Gwajima Mkurugenzi wa Tiba toka Wizara ya Afya amewaasa watumishi hao kuimarisha huduma kwa wateja ili kuongeza mapato ya hospitali hiyo badala ya kuilalamikia Serikali kwa kila jambo.

Naye Bi. Emma Kuchehe mwananchi Masasi Mji, amesema huduma zinazotolewa kituoni hapo ni nzuri na anawashukuru watumishi wote lakini anaomba Serikali iongeze majengo ya hospitali.

Dkt. Zainab Chaula amehitimisha ziara yake ya kikazi iliyoanza tarehe 4 hadi Juni, 2018 mkoani Mtwara na kurejea Jijini Dodoma kuendelea na majukumu mengine.

                                                                                                Imeandikwa na. Fred Kibano