Bilioni 33.5 zatengwa kwa ajili ya ujenzi wa wodi Hospitali za Wilaya 67 nchini

Imewekwa tar.: September 9th, 2019

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo amesema kuwa SERIKALI imetenga jumla ya Sh bilioni 33.5 kwa ajili ya kujenga wodi katika hospitali 67 mpya za Wilaya zinaoendelea kujengwa.

Ameyasema hayo leo akiwa kwenye ziara ya siku moja ya kukagua maendeleo ya ujenzi hospitali ya Wilaya ya Chamwino inayojengwa katika kijiji cha Mlowa Barabarani, Jijini Dodoma.

Mhe. Jafo amesema kuwa baada ya Serikali kukamilisha ujenzi wa majengo saba katika awamu ya kwanza, pia inatoa Sh milioni 500 kwa kwa Hospitali 67 zilizojengwa katika kila Halmashauri nchini ili kuongezea majengo hayo.

"Rais wa Jamhuri ya Muungano wa Tanzania Mhe. John Magufuli ametoa shilingi milioni 500 kwa kila hospitali za wilaya zilizojengwa  ili zitumike kujenga wodi za kulaza wagonjwa lengo likiwa ni kuboresha huduma za afya  na kuwawezesha wananchi kupata huduma bora” Amesema Mhe. Jafo  

Mhe Jafo amesisistiza kuwa hatatoa fedha  hizo mpaka atakapohakikisha ujenzi wa majengo saba yanakamilika kwa asilimia 100 kwa kuwa zikitolewa mapema zitatumika kwa matumizi mengine jambo ambalo litakuwa ni kinyume na malengo yaliyopangwa

Kuhusu Ujenzi wa Hospitali ya Wilaya ya Chamwino Mhe Jafo amesema ameridhishwa na hatua iliyofikiwa  na kuwahamasisha kuhakikisha wanakamilisha baadhi ya vitu vilivyobaki ili wananchi waweze kupata huduma.

"Hapa mlipofikia nimeridhishwa ingawa mmechelewa, hali mliyokuwa nayo nilipokuja awali ilikuwa mbaya na ya aibu, tusingesimamia kwa karibu mpaka sasa kungekuwa hakuna kitu.”Amesema Mhe. Jafo

 Mhe.  Jafo ameagiza mhadisi mshauri kuhakikisha anasisimamia kwa karibu umaliziaji wa hospitali hiyo ili kusiwe na kasoro ambazo zinaweza kuharibu kazi nzuri iliyofanyika.

Naye Mkuu wa Mkoa wa Dodoma, Dk Binilith Mahenge pamoja na kuishukuru serikali kuhakikisha huduma za afya zinaimarika katika Mkoa wa Dodoma, amesema Shirika la Umeme Tanzania (Tanesco) linatarajia kuingiza umeme katika majengo hayo kuanzia wiki ijayo.

"Mkandarasi aliyepewa kazi ya kufikisha umeme wa REA ndiye atakayeingiza umeme kwenye majengo yetu haya na kazi hii inaanza wiki ijayo.”Amesema Mhe. Mahenge

Naye Mkurugenzi wa Halmashauri ya Wilaya Chamwino, Athuman Masasi amesema wamepokea Sh bilioni 1.5 na mpaka sasa wametumia Sh bilioni 1.438 tangu kuanza ujenzi huo Februari mwaka huu  na kubakiwa na bakaa ya Sh milioni 61.

"Ujenzi wa majengo haya umefikia zaidi ya asilimia 80 na tuko katika hatua za umaliziaji. Tulishindwa kumaliza kwa wakati kwasababu mfumo wa malipo ulifungwa, lakini sasa zimefunguliwa baada ya kufanyika kwa usuluhishi wa kibenki, na ndio tunakamilisha yale yaliyobaki”. Amesema Masasi

Aidha amesema majengo yaliyokwishajengwa mpaka sasa ni Jengo la Wodi ya mama na mtoto, Jengo la Kufulia, Chumba cha Upasuaji, jengo la utawala, jengo la kuhifadhia maiti, chumba cha Mionzi na Jengo la kutolea dawa.

Na Angela Msimbira OR-TAMISEMI