BIL.63. 2/- KUTEKELEZA MIRADI YA MAENDELEO ILEMELA NA NYAMAGANA

Imewekwa tar.: September 13th, 2022

OR -TAMISEMI

Waziri wa Nchi, Ofisi ya Rais Tawala za Mikoa na Serikali za Mitaa (TAMISEMI), Mhe. Innocent Bashungwa amesema kupitia miradi ya kupendezesha miji (Tactic), Serikali imetenga sh. bilioni 63.2 kwa ajili kutekeleza miradi ya maendeleo katika Manispaa ya Ilemela na Jiji la Mwanza mkoani Mwanza.

Amesema hayo leo Septemba 13, 2022 katika hafla ya Uzinduzi wa Mradi wa stendi ya mabasi na maegesho ya malori, eneo la Nyamongoro Manispaa ya Ilemela uliofanywa na Makamu wa Rais wa Jamhuri ya Muungano wa Tanzania Mhe. Dkt. Philip Mpango.

Mhe.Bashungwa amesema kuwa Serikali itaelekeza shilingi bilioni 28.8 katika Manispaa ya Ilemela kwa ajili ya kupendesha Jiji la Mwanza kupitia miradi ya Tactic.

Amefafanua kuwa shilingi bilioni 12.7 zitatumika kujenga Soko kuu la Kirumba pamoja na barabara zinazozunguka soko zenye kilomita 2.9 ambavyo vitatekelezwa kwa pamoja.

Pia, amesema mradi huo utajenga Barabara ya Buswelu- Busenga - Cocacola yenye urefu wa kilomita 3.3 kwa kiwango cha lami ambayo itagharimu sh.bilioni 4.6 na barabara ya Buswelu - Nyamadoke - Nyamhongolo yenye kilomita 9.5 itayogharimu shilingi bilioni 11.5

Aidha, Bashungwa amesema Serikali itapeleka shilingi. bilioni 16 katika jiji la Mwanza kwa ajili ya kujenga barabara ya Igoma - Buhongwa yenye urefu wa kilometa 14.

Vile vile, amesema sh. bilioni 9.2 zitajenga Soko la Samaki Mkuyuni na sh.bilioni 9.2 zitakarabati kingo za mto Mirongo urefu wa kilometa 9.5 katika jimbo la Nyamagana.

Wakati huo huo, Bashungwa ameeleza kuwa Serikali inaendelea kuboresha mazingira ya Wafanyabiashara wadogo (Machinga) katika Majiji na Manispaa kwa kutafuta maeneo rafiki na kujenga miundombinu ya kufanyia biashara.