BASHUNGWA AAGIZA UKAMILISHAJI WA UJENZI WA VITUO VYA AFYA 233 KABLA YA APRILI 2022.

Imewekwa tar.: March 16th, 2022

Waziri wa Nchi Ofisi ya Rais Tawala za Mikoa na Serikali za Mitaa Mhe. Innocent Bashungwa  ameziagiza Halmashauri zote nchini zilizopokea fedha kuanzia mwezi Oktoba – Disemba 2021 kwa ajili ya ujenzi wa vituo vya afya 233  kuhakikisha vinakamilika ifikapo tarehe 30 Aprili, 2022.

Akiongea na Waandishi wa Habari leo tarehe 16 Machi, 2022 baada ya kukagua  maendeleo ya ujenzi wa kituo cha afya cha Igawilo Halmashauri ya Jiji la Mbeya Mkoani Mbeya Waziri Bashungwa amesema  halmashauri ambazo haitakamilisha  ujenzi  hawatapewa fedha  za kuendeleza ujenzi.

Bashungwa amesema  kwa Halmashauri zitakazoshindwa kukamilisha ujenzi  kwa wakati uliotolewa na Serikali, Wakuu wa Wilaya na Wakurugenzi  Watendaji  wa Halmashauri  watachukuliwa hatua za kinidhamu, hivyo amewaagiza Wakuu wa Mikoa yote nchini kuhakikisha wanasimamia ukamilishaji huo.

Ameagiza majengo yote ya kutolea huduma  yaliyokamilika  katika maeneo mbalimbali nchini  kuanza kutoa huduma  kwa wananchi  na sio kuyaacha na kuwa kama magofu, watakaobainika  majengo yamekamilika na hayatumiki serikali haitasita  kuwachukulia hatua.

Vilevile,  Waziri Bashungwa  amesema Jumla ya shilingi bilioni 243.9  zimetolewa  katika kipindi cha mwezi Julai 2021 hadi Februari,2022 kwa ajili ya ujenzi wa vituo vya kutolea huduma ya msingi .

Amefafanua kuwa fedha  kiasi cha shilingi  bilioni 113.7  ruzuku ya ndani kwa mwaka 2021/22 zimetumika kwa ajili ya ujenzi wa Hospitali za Wilaya 104, shilingi Bilioni 66.3 kwa ajili ya kuendeleza na kukamilisha Ujenzi wa Hospitali hizo ambazo zilianza ujenzi katika mwaka wa fedha 2018/2019 na 2019/2020.

Waziri Bashungwa ameendelelea kusema  jumla ya shilingi bilioni 21.8 kwa ajili ya ukamilishaji na ukarabari wa vituo vya afya 61, bilioni 22.6 kwa ajili ya ukamilishaji  wa zahanati 141 na ununuzi wa  vifaa tiba bilioni 3.1 kwa ajili ya ununuzi wa vifaa tiba kwenye vituo  vya kutolea huduma za afya.

Aidha, Jumla ya Shilingi billioni 44.5 zimetolewa kwa ajili ya ujenzi wa Majengo ya dharura 80, Wagonjwa mahututi majengo 26, Kituo cha matibabu ya magonjwa ya mliopuko 1 na Nyumba za watumishi 150(3 in 1) ambazo zitachukua familia 450.