ALAT 'Wafunguka' ushuru wa Majengo, Mabango na vitambulisho vya wajasiriamali

Imewekwa tar.: February 4th, 2021

Na Atley Kuni, DODOMA

JUMUIYA ya Tawala za Mitaa Tanzania (ALAT), imeipongeza Serikali kwa hatua yake ya kurejesha shughuli ya kukusanya kodi ya majengo, ushuru wa Mabango na vitambulisho vya wajasiriamali kwa Halmashauri kwani hatua hiyo itaongeza mapato kwa Serikali kutokana na mamlaka hizo kuwa na mtandao mpana wa kuvifikia vyanzo hivyo vya mapato.

Akizungumza Ofisini kwake leo jijini Dodoma, Katibu Mkuu wa ALAT Taifa Bw. Elirehema Kaaya, amesema Jumuiya hiyo imefarijika sana kwa uamuzi huu wa Serikali kwani suala la kutaka vyanzo hivyo virejeshwe Halmashauri ilikuwa moja ya ajenda katika Mkutano Mkuu wa Jumuiya hiyo, uliofanyika mwaka juzi, jijini Mwanza.

“Katika Mkutano Mkuu wa ALAT, uliofanyika kuanzia tarehe, 22 hadi 24, Julai, 2019, jijini Mwanza, moja ya ajenda ilikuwa kutazamwa upya kwa vyanzo vya mapato ili kushauri namna nzuri ya kuvirejesha katika Mamalaka ya Serikali za Mitaa, hivyo kwa hatua hii, Jumuiya ya Serikali za Mitaa tumefarijika sana, na kwakweli tunampongeza sana Mhe. Rais kwakutambua mtandao mpana wa mamlaka hizi, tunaimani kabisa watendaji katika mamlaka watajipanga na tija inayokusudiwa na serikali itapatikana” amesema Kaaya.

Ameongeza kuwa kutokana na mtandao wa Mamlaka za Serikali za Mitaa jinsi ulivyo, unaruhusu mamlaka hizo kutambua bango gani liko wapi, hivyo ni rahisi kwa watendaji wake kuweza kukusanya ushuru wake.

“Tunaposema Halmashauri zina mtandao mpana tunamaanisha kuwa mamlaka hizi zina uwezo wa kuwafikia wananchi wake kuanzia ngazi za wilaya, kata, vijiji au Mitaa hadi vitongoji hivyo siyo rahisi kuwepo suala la ukwepaji wa kodi, kwakuwa kwa umoja wao wanao uwezo wa kujipanga na kujua vichochoro vyote,” amesema.

Amesema Serikali ina wakusanya ushuru katika ngazi za kata, mpaka vijiji na hao wote waliwezeshwa mashine za kukusanyia mapato za POS, ambazo zimekuwa msaada mkubwa katika kufanikisha suala la ukusanyaji wa mapato ya serikali na kuzuia mianya ya ubadhilifu.

Katibu Mkuu huyo wa ALAT Taifa amekumbusha kuwa Mwaka 2019, Ofisi ya Rais-TAMISEMI, iligawa mashine mpya za kisasa 7227 kwa mamlaka za Serikali za Mitaa ili kuweza kusaidiana na mashine 10,100 zilizokuwepo awali, lengo likiwa ni kuzirahisishia Mamlaka hizo kukusanya mapato yake, mbalimbali

Serikali kupitia Ofisi ya Rais-TAMISEMI na Wizara ya fedha, tarehe 01 Februari, ilitangaza kurejeshwa kwa shughuli za ukusanyaji wa ushuru wa majengo, mabango na vitambulisho vya wajasiriamali katika mamlaka za Serikali za Mitaa, isipokuwa kwa vyanzo vilivyo chini ya TANROAD na TARURA,huku sababu kubwa ikitajwa kuwa ni kuongeza mtandao wa kukusanya mapato hayo, ambayo yalikuwa yakikusanywa na Mamlaka ya mapato nchini. (TRA) toka ilipo kabidhiwa mwaka 2018.