160 Kunufaika Mabweni Shule ya Wasichana Jangwani

Imewekwa tar.: February 14th, 2020

Na Nteghejwa Hosseah- DSM

Naibu Katibu Mkuu Ofisi ya Rais Tawala za Mikoa na Serikali za Mitaa, anayeshughulikia Elimu, Gerald Mweli ameridhishwa na ujenzi wa mabweni mawili  katika Shule ya Sekondari ya Wasichana Jangwani ya jijini Dar Es Salaam, ambayo kukamilika kwake yatatumika na wanafunzi wapatao 160 huku kila bweni moja likiwa na uwezo wa kuchukua wanafunzi 80.

Mweli amebainisha hayo muda mfupi alipo zulu shuleni hapo hivi karibuni kwaajili ya kukagua maendeleo ya ujenzi wa mabweni hayo pamoja na miundombinu mingine inayoendelea kukarabatiwa katika shule hiyo ambapo alionesha kuridhishwa na hatua iliyofikiwa hadi hivi sasa.

“Fedha hizi zimetolewa na Serikali maalum kwa ajili ya kuwasaidia na kuwajali watoto wa kike waweze kusoma kwa amani na wapate mazingira bora ya kujifunzia  katika kipindi chote cha masomo yao na kuwaondolea vikwazo vinavyoweza kuathiri kumaliza masomo yao kwa usalama”Alisema Mweli

Aliongeza kuwa miundombinu ya shule hii ilikua imechakaa sana kutokana na ukongwe wake kwani shule hiyo ilijengwa toka enzi za Ukoloni mwaka 1928 na ilikusudiwa maalum kwa watoto wa kike pamoja na wale wenye mahitaji maalu.

Mweli aliongeza kuwa, zaidi na ujenzi wa mabweni hayo, Mhe. Rais John Pombe Magufuli alitoa shilingi milioni 90 kwa ajili ya ukarabati wa miundombunu ya shule hiyo, hivyo kwa kiasi  kikubwa zimesaidia kuifanya shule hiyo kuwa katika hali nzuri tofauti nah apo awali.

Mweli pia alitumia fursa hiyo kutoa maelekezo kwa uongozi wa Manispaa ya Ilala kuhakikisha kuwa ujenzi huo unakamilika ndani ya mwezi mmoja na ahakikishe kuwa mabweni hayo yanapata vitanda vyote kwa ajili ya wanafunzi waliochaguliwa katika shule hiyo waweze kuyatumia.

Pia aliwaambia Walimu wa shule hiyo kuwa, waongeze juhudi katika kufundisha na kusimamia wanafunzi ili waweze kuondoa sifuri  na ufaulu wa daraja la nne ili kurudisha hadhi ya shule hiyo.

Katika hatua nyingine, Naibu katibu Mkuu Mweli, amemuagiza Mkurugenzi wa Elimu Sekondari OR-TAMISEMI, kuhakilisha anapeleka vitabu vya kutosha vya kujifunzia katila shule hiyo.