Serikali Kuwachukulia Hatua Waliozisababishia Halmashauri Hati Chafu

Imewekwa tar.: August 20th, 2018

Naibu Waziri Ofisi ya Rais Tawala za Mikoa na Serikali za Mitaa (OR - TAMISEMI), Joseph Kakunda amesema serikali imeanza kuwachukulia hatua za kinidhamu watumishi wote wa halmashauri nchini waliosababishia halmashauri zao kupata hati chafu na zenye mashaka katika Ripoti ya Mdhibiti na Mkaguzi Mkuu wa Hesabu za Serikali kwa Mamlaka za Serikali za Mitaa ya mwaka 2016/2017.

Akijibu hoja za wajumbe wa Kamati ya Bunge ya Hesabu za Mamlaka za Serikali za Mitaa (LAAC) katika ukumbi wa Msekwa bungeni Jijini Dodoma leo, Mhe Kakunda amesema Serikali inaendelea kuongeza kasi katika usimamizi na uboreshaji wa utendaji kazi ili kuhakikisha hakuna halmashauri inayopata hati chafu pamoja na hati zenye mashaka.

“Hatua zinaendelea kuchukuliwa ili kuboresha utendaji kwenye sekta mbalimbali za Mamlaka ya Serikali za Mitaa ikiwemo kuwachukulia hatua watumishi waliosababishia halmashauri kupata hati chafu kama vile kuwapa onyo kali na kuwafukuza kazi” Alisema Naibu Waziri Kakunda.

Aidha Waziri Kakunda amesema uchambuzi unaendelea nchi nzima ili kujua ni watumishi wangapi wamechukuliwa hatua za kinidhamu zikiwemo kuwashusha vyeo, kuwafukuza kazi, kuwapa onyo pamoja na kuwapeleka mahakamani.

Kuhusu kufanyika kwa ukaguzi maalumu katika halmashauri za Igunga, Tabora Manispaa pamoja na Kigoma Ujiji ambayo imepata hati isiyoridhisha kwa miaka mitatu mfululizo, Mwenyekiti wa Kamati hiyo Abdallah Chikota ameitaka Ofisi ya Rais TAMISEMI kugharamia ukaguzi huo baada ya Ofisi ya Mkaguzi na Mdhibiti wa Hesabu za Serikali (CAG ) kudai kuwa wanakabiliwa na changamoto ya bajeti.

Awali akiwasilisha muhtasari wa taarifa ya jumla ya Mdhibiti na Mkaguzi Mkuu wa Hesabu za Serikali kwa Mamlaka za Serikali za Mitaa, katika mwaka wa fedha ulioishia Juni 30, 2017, Naibu Mkaguzi Mkuu wa Hesabu za Serikali Jasper Mero amesema idadi ya Hati za Ukaguzi zinazoridhisha imeongezeka.

“Idadi imeongezeka kutoka 138 sawa na asilimia 81 za mwaka 2015/2016 hadi kufikia 166 sawa na asilimia 99 kwa mwaka 2016/2017, na idadi ya Hati zenye mashaka imepungua kutoka 32 sawa na aslimia 19 kwa mwaka 2015/2016 mpaka 16 sawa na asilimia nane kwa mwaka 2016/2017” Amesema Mero.

      Anaandika Zulfa Mfinanga - OR TAMISEMI