ZAMBIA WAJA KUJIFUNZA TANZANIA

Imewekwa tar.: May 17th, 2024

NAIBU Waziri Ofisi ya Rais Tawala za Mikoa na Serikali za Mitaa (TAMISEMI) anayeshughulikia elimu Mhe. Zainabu Katimba  amekutana na wajumbe wa Kamati ya Bunge ya Hesabu za Serikali za Mitaa ya Zambia na kubadilishana uzoefu juu ya miradi inayotekelezwa kupitia mfuko wa jimbo na mapato ya ndani ya Mamlaka za Serikali za Mitaa. 

Mhe. Katimba amekutana  na wajumbe wa Kamati hiyo leo Mei 16, 2024 jijini Dodoma kabla ya kufanya ziara yao ya kikazi ya kukagua miradi mbalimbali inayotekelezwa na Halmashauri ya Jiji la Dodoma kupitia fedha za mfuko wa Jimbo na mapato ya ndani. 

Akifafanua kuhusu mfuko wa Kuchochea Maendeleo ya Jimbo Mhe. Katimba amesema mfuko huo ulianzishwa kwa Sheria ya Bunge ya 2009 kwa lengo la kuhakikisha miradi ambayo ni vipaumbele vya wananchi katika jimbo husika na ambayo havikupata fedha katika bajeti inapata fedha za utekelezaji.

Amesema fedha za jimbo kwa ajili ya majimbo ya uchaguzi ambayo yameanzishwa na Tume ya Taifa ya Uchaguzi kwa kuzingatia Katiba. 

Aidha, amesema katika kuwanufaisha wananchi na miradi inayotekelezwa katika maeneo yao, Mfuko unawapa fursa watu binafsi wanaofanya kazi katika ngazi ya chini kupitia wabunge wao kushiriki kikamilifu katika kufanya uchaguzi wa matumizi ambayo huongeza ustawi wao kulingana na mahitaji na mapendeleo yao. 

Naye Mwenyekiti wa Kamati ya Bunge ya Hesabu za Serikali za Mitaa ya Zambia, Mhe. Darios Mulunda ameishukuru Tanzania kwa kuendelea kutekeleza miradi ya maendeleo na kuleta maendeleo kwa wananchi,

Amesema utekelezaji wa miradi ya maendeleo kupiti mfuko wa jimbo na mapato ya ndani katika Mamlaka za Serikali za Mitaa kunasaidia kuharakisha maendeleo kwa wananchi na kuongeza imani na Serikali yao.