Waziri Jafo Agomea gharama za Jengo la Maabara Mafinga

Imewekwa tar.: May 25th, 2018

Waziri wa Nchi Ofisi ya Rais TAMISEMI Selemani Jafo amegomea gharama za Jengo la maabara linalojengwa katika hospitali ya wilaya ya Mafinga chini ya  ufadhili wa USAID.

Hali hiyo ilijitokeza wakati Waziri Jafo alipokuwa mkoani Iringa kukagua miradi ya maendeleo.  Waziri Jafo alijulishwa kwamba jengo hilo linajengwa kwa usimamizi wa wafadhali wenyewe kwa gharama ya  shilingi za kitanzania milioni mia tisa (900,000,000/=). Gharama hizo zilimshitua Waziri Jafo kwani jengo linalojengwa halifanani hata kidogo na gharama hizo.

Kutokana na hali hiyo Jafo amemuagiza mkuu wa wilaya ya Mufindi kuwajulisha wafadhili hao kwamba wawasilishe gharama halisi za ujenzi wa jengo hilo baada ya kukamilika kwake kwani hata kama ni msaada lakini lazima watoe msaada wenye uhalisia kwani kiwango cha fedha zinazo tajwa zingeweza kujenga majengo zaidi ya saba ya aina hiyo tena yenye ubora endapo fedha hizo zimetolewa kwa Halmashauri husika ambapo utaratibu wa force Account ungeweza kutumika kama unavyo tumika sasa katika ujenzi wa miundombinu ya afya hapa nchini.

Waziri Jafo alisisitiza kwamba hata kama ni msaada lakini tuelewe kwamba msaada huo utahesabika kwamba umetolewa kwa serikali ya Tanzania hivyo thamani ya fedha lazima ilingane na uhalisia.

Baadhi ya viongozi wa mkoa wa Iringa na Halmashauri ya mji wa Mafika wakifuatilia 

maelekezo ya Waziri Jafo alipotembelea mkoani humo