Wananchi wa kikombo waipongeza Serikali kwa kuanzisha kliniki tembezi

Imewekwa tar.: August 16th, 2019

Wananchi wa Kijiji cha Kikombo katika Halmashauri ya Jiji la Dodoma wameishukuru Serikali ya Awamu ya Tano kwa kuanzisha huduma ya kiliniki tembezi ambayo inatoa huduma za afya karibu na maeneo wanayoishi jamii.

Hayo yamesemwa na Diwani wa Kata ya Kikombo Mhe. Yona Kusaja wakati wa uzinduzi wa kiliniki tembezi uliyofanyika leo katika Kituo cha afya Kikombo kilichopo katika Kijiji cha Kikombo, Kata ya Kikombo, Halmashauri ya Jiji la Dodoma.

Mhe. Kusaja amesema kuwa ujio wa kiliniki tembezi umesaidia kwa kiasi kikubwa kuwepo kwa wataalam waliobobea katika magonjwa mbalimbali hivyo kuwafanya wananchi  wengi  kujitokeza  kwa ajili ya kufanyiwa vipimo  na kupatiwa  tiba kwa haraka na wakati kwa gharama nafuu.

“Wazee wengi wamejitokeza kuja kuchunguzwa afya zao jambo ambalo linatia moyo, kutokana na huduma hizo kusogezwa karibu na wananchi na wanatumia gharama ndogo kutibiwa” Amesisitiza Mhe. Kusaja.

Akizindua Kiliniki hiyo Tembezi Mkuu wa Wilaya ya Dodoma Mhe. Patrobas Katambi amewaomba wananchi kutokuwakatisha tamaa watoa huduma za afya nchini bali wawatie moyo kwa kuwa wanafanyakazi ngumu ya kuokoa jamii hivyo hawana budi kuwaombea na kuwajali watumishi hao.

“Watumishi wa kada ya Afya wanafanyakazi katika mazingira magumu ya kuwahudumia wagonjwa na kuficha siri zao, hivyo ifike wakati wananchi watambue kuwa kazi hiyo ni ya kujitolea hivyo tuwatie moyo na kuwaombea kwa mwenyezi mungu” Amesisitiza Mhe. Katambi

Mhe. Katambi amewataka watumishi wa afya kufanya kazi kwa weledi kwa kuzingatia maadili ya utumishi wa umma wa kuwajali na kuwahudumia wananchi kwa upendo ili waweze kuvutiwa na huduma zinazotolewa katika vituo vya kutolea huduma za afya nchini.

Amesema kuwa ni wajibu wa watoa huduma za afya nchini kuhakikisha wanatoa huduma bora za afya  na zenye viwango kwa jamii ili kupunguza malalamiko katika Sekta ya Afya nchini.

Wakati huohuo  Afisa Ustawi wa Jamii Bi. Shekilaga Nkinda kutoka Ofisi ya Rais Tawala za Mikoa na Serikali za Mitaa (ambaye pia ni Mlezi wa Timu za Afya Mkoa wa Dodoma) amewaomba wananchi kuhakikisha wanakitumia kituo cha afya cha Kikombo kwa kuwa ni mali yao na kimejengwa kwa ajili ya kuwapatia huduma bora za afya.

Amesema kuwa inasikitisha kuona kuwa kituo kimejengwa kwa gharama kubwa na Serikali lakini bado wananchi wanaenda kupata huduma hizo katika kituo cha afya cha Chamwino na Hospitali ya Mkoa wa Dodoma jambo ambalo halileti picha nzuri kwa jamii.

“Serikali imetumia gharama kubwa kujenga miundombinu ya kituo hichi cha afya lakini inashangaza kwa mwezi mmoja ni wakina mama 30 tu ndio waliokuja kujifungua hapa, ninawaomba wananchi mkitumie kituo chenu “ Anasisitiza Nkinda

Bi. Nkinda amewaomba wananchi kuhakikisha wanalinda miundombinu ya kituo hicho na pia wanatoa taarifa kwa viongozi pale wanapoona huduma zinazotolewa katika kituo hicho zipo nchi ya viwango vinavyohitajika.

Amewaomba wananchi kuhakikisha wanajiunga na bima ya afya ili waweze kupata huduma za afya kwa urahisi pale wanapokuwa hawana fedha.

Hata hivyo, Mganga Mkuu wa Halmashauri ya Jiji la Dodoma Dkt. Gatete Mwihava amesema kuwa wamebuni huduma ya kiliniki tembezi ili iweze kuwasaidia wananchi maskini kwa kuwaletea wataalam wa magonjwa mbalimbali ili kuwapunguzia gharama za kutembea umbali mrefu kufuata huduma hiyo.

Amesema huduma ya kliniki tembezi inawataalam wa macho, meno, wataalam wa afya ya mama na mtoto, magonjwa yasiyoambukizwa, saratani ya kizazi na matiti, na hivyo huduma hiyo itaendelea kutelewa katika Halmashauri zote za Jiji la Dodoma.

Aidha, ikumbukwe kuwa, Ofisi ya Rais TAMISEMI ilishatoa maelekezo kwa Timu za Afya Mikoa na Halmashauri nchi nzima kwamba, wahakikishe wanazingatia kuanzisha huduma za Kliniki Tembezi ili, kuwapunguzia mzigo wananchi kufuata huduma mbali na makazi yao.

Na. Angela Msimbira KIKOMBO