WADAU WA MAZINGIRA WAPONGEZWA KWA UTEKELEZAJI WA AFUA KWENYE NGAZI MSINGI.

Imewekwa tar.: October 21st, 2024

Ofisi ya Rais – TAMISEMI imewapongeza Wadau wa mazingira kwa kufanya kazi kubwa nchini kwa namna wanavyoshiriki na kutoa rasilimari mbalimbali na namna wanavyowezesha utekelezaji wa afua hizo kwenye ngazi msingi.

Yamesemwa hayo na Mkurugenzi Msaidizi wa Idara ya Tawala za Mikoa Ofisi ya Rais TAMISEMI Bw. Enock Nyanda wakati akifunga Kongamano la 8 la Mabadiliko ya Tabianchi katika ukumbi wa PSSSF uliopo Jijini Dodoma.

Bw. Nyanda amesema kama wadau wa mazingira, tunaweza kuwashirikisha vizuri vijana wetu na kuweza kuangalia ni namna gani tunaweza kuwaunganisha na Taasisi za kifedha ili kuweza kuwasaidia vijana wetu.

Pia amesema wananchi na jamii kiujumla wanaitaji kushirikishwa pia kuwezeshwa kwa namna wowote ile ili kuweza kukabiliana na hizo athari za mabadiliko ya tabianchi.

Aidha Bw. Nyanda amesema tunatakiwa kuwa na namna bora ya kushirikiana na kuwa na jambo la kufanya kila mmoja kwenye taasisi yake ili kuwezesha hicho ambacho tunakiona ni athari kubwa ya mabadiliko ya tabia nchi.

Pia amewataka wadau kuhakikisha wanaunga mkono juhudi za Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania katika kuhakikisha kwamba watanzania tunakuwa na ustawi mzuri na maendeleo katika jamii zetu.

Kwa miaka miwili iliyopita Serikali ya Awamu ya Sita inayoongozwa na Mheshimiwa Dkt. Samia Suluhu Hassan imewezesha maandalizi, mapitio na uzinduzi wa dira na mkakati wa nishati safi ya kupikia ikiwa ni mojawapo ya afua ambayo inawezesha kuhimili au kufanya ustahimilivu wa mabadiliko ya tabianchi.