VITUO VYA AFYA SITA VYAJENGWA WANGING’OMBE NDANI YA MIAKA MIWILI YA RAIS DKT.SAMIA

Imewekwa tar.: February 4th, 2023

Wanging'ombe - Njombe

Naibu Waziri Ofisi ya Rais – TAMISEMI na Mbunge wa Jimbo la Wanging'ombe, Dkt. Festo J. Dugange  amesema Mheshimiwa Rais Dkt. Samia Suluhu Hassan ameimarisha utaoaji wa huduma za afya katika Halmashauri ya Wanging’ombe ambapo amewezesha Ujenzi wa vituo vya afya sita katika kipindi cha miaka miwili ya utawala wake.

Amasema hayo leo tarehe 04 Februrari 2022 wilayani Wanging’ombe mkoani Njombe wakati akieleza utekelezaji wa Ilani ya Chama Cha Mapinduzi katika Mkutano Mkuu wa Halmashauri kuu ya CCM na maadhimisho ya  miaka 46 kuzaliwa kwa CCM.

Dkt. Dugange amesema Vituo vya Afya vya Saja, Usuka, Ilembula na Imalinyi vimeshakamilika na ujenzi wa vituo Vya afya Vya Wangama na Igima vinaendelea na Ujenzi ambapo vimesaidia kusogeza huduma za afya kwa Wananchi na kupunguza gharama za kufuata huduma za afya mbali.

Amesema Hospitali ya Halmashauri ya Wilaya Wanging’ombe imepelekewa shilingi milioni 500 kujenga wodi ya Wanaume, Wanawake na Watoto, shilingi milioni 300 zimejenga Jengo la Wagonjwa wa dharura na milioni 200 zimenunua Vifaa tiba ikiwa ni pamoja na kupelekwa kwa Mashine ya kidigitali ya X-Ray.

Aidha, katika Sekta ya elimu Dkt. Dugange amesema utoaji wa elimu umeimalishwa ambapo zimejengwa shule  tatu mpya za sekondari na kupelekea kata zote 21 katika wilaya ya Wanging’ombe Kuwa na Shule za Sekondari.

Dkt. Dugange amesema Shule maalum ya Sayansi ya Wasichana ya kidato cha kwanza hadi cha sita ya Mkoa inaendelea kujengwa katika Halmashauri ya Wanging’ombe kwa gharama ya shilingi bilioni 4, zinazoenda sambamba na ujenzi wa nyumba vya madarasa katika shule za msingi na sekondari.

Kadhalika, Dkt. Dugange amesema miundombinu ya barabara inaendela kuimarishwa ambapo bajeti ya TARURA imeongezeka hadi kufikia shilingi bilioni 4.9 kwa mwaka wa fedha 2022/23 ambayo itawezesha Wananchi kuendelea na uzalishaji kwa kuwa watakuwa na uhakika na barabara za kusafirisha mazao.

Pia, Dkt. Dugange amesema miradi ya maji inaendelea kutekelezwa katika Halmashauri ya Wanging’ombe ambapo ikikamilika itaweza kusambaza maji safi na salama katika wilaya nzima.

Nae, Mkuu wa Wilaya Wanging'ombe, Mhe. Claudia U. Kitta amesema Halmashauri ya Wilaya Wanging’ombe imeongeza ukusanyaji wa Mapato ya ndani ambapo katika mwaka wa fedha 2021/22 zilikusanywa bilioni 3.4 sawa na 110% na katika mwaka wa fedha 2022/23 kufikia mwezi Disemba 30, 2022 zimekusanywa bilioni 1.6