Vikundi 182 Kigamboni vyapewa Mikopo ya Shilingi Milioni 616

Imewekwa tar.: March 15th, 2021

Na Ada Phestor, Kigamboni

Halmashauri ya Manispaa ya Kigamboni imetoa mikopo yenye thamani ya shilingi milioni 616 ikiwa ni asilimia 10 ya mapato ya ndani ya halmashauri hiyo kwa vikundi 182 vya wanawake, vijana na walemavu katika mwaka wa fedha 2019/20 .

Mkurugenzi wa Manispaa hiyo Erasto Kiwale amesema fedha hizo zilitolewa kwa vikundi 126 vya wanawake, 51 vijana na vikundi 5 vya walemavu.

Amesema mikopo hii imekuwa na tija kwa wakazi wa Kigamboni kwani imeweza kukuza mitaji ya wajasiriamali, na kuwatoa wajasiriamali kwenye mitaji midogo waliyokuwa nayo mfano mamalishe aliyekuwa na mtaji wa laki 3 kupitia mfuko huu umemuwezesha kuwa na mtaji wa milioni 3.

Ameongeza kupitia mikopo hii vijana wengi wameweza kujiunga kwenye vikundi na kuanzisha miradi na kupata mikopo inayowasaidia kujiendeleza kiuchumi na kupunguza wimbi la vitendo vya uhalifu hali iliyopelekea kuwa na utulivu katika Mji wa kigamboni .

Miongoni mwa vikundi vilivyopata mikopo hiyo ni Kikundi cha Vijana wa Gonga gonga ambacho kinajihusisha na ufundi selemala wa kutengeneza Samani mbali mbali.

Mwenyekiti wa Kikundi hicho Hashim Shelukindo amekiri kikundi chake kunufaika na Mkopo wa Manispaa hiyo ambapo waliweza kupokea kiasi cha Shilingi Milion 8 ili kuboresha shughuli zao na hiyo ni kwa sababu ya juhudi na jitihada zao katika urejeshaji.

“Tunaishukuru Manispaa, inajali sana kikundi chetu na ni sababu hatusumbui kwenye marejesho, mkopo umetuwezesha kuboresha biashara na ofisi kwa ujumla hivyo tunaomba wakati mwingine tukiomba mkopo tupate kiasi tuhachohitaji sababu hatusumbui kurejesha,”amesema Shelukindo

Kwa upande wake Katibu wa kikundi cha Kona Bar ambacho kinanufaika na mkopo wa pikipiki 3 zenye thamamni ya Milion 8, Sande Patric amesema kabla ya kupata mkopo huo walikuwa wanafanyia kazi pikipiki za watu binafsi ambazo zilikuwa zikiwabana kwenye muda wa utendaji kazi lakini pia kipato.

Ameongeza kuwa wao kama kundi wamelenga kuhakikisha kila mwanachama anapata pikipiki yake kwa mikopo hii ya serikali ambayo imewapa ari ya kufanya kazi kwa bidii ili warejeshe mikopo hiyo bila tatizo hatimaye wajumuishwe tena kwenye mikopo mingine.

Nacho Kikundi cha watu wenye ulemavu cha fighting against poverty group kimeishukuru serikali kwa kuwapa fursa watu wenye ulemavu na kuwaondolea hali ya utegemezi na kuombaomba kwa kujiunga na vikundi vya kiuchumi vinavyowawezesha kujitegemea na kuhudumia familia zao.

Mjumbe wa kikundi cha fighting against poverty group Khamis Wana amesema kuwa Manispaa iliwapatia mkopo wa  bajaji 5 wenye thamani ya Milioni 39.8 ambazo zimewapatia ajira ya kuingiza kipato na kuondokana na hali ya utegemezi.

“Tunaishukuru Serikali tunaomba iwasaidie hata na walemavu wengine ambao mitaji yao ni midogo kwaajili ya shughuli ndogo kama machinga ili nawao waweze kujikwamua kupata riziki zao wenyewe”amesema Khamis.

Naye katibu wa kikundi cha Tushikamane Habiba Mhina amesema kuwa wanashukuru kupata mkopo wa Manispaa kiasi cha Milioni 3 zilizowawezesha kununua mashine ya kuchomoleaa ambayo hapo awali hawakuwa nayo na kununua vyuma na vifaa vingine ili kukuza biashara yao ya utengenezaji wa samani kwa kutumia vyuma na uchomeleaji wa Vitanda,madirisha ,mageti n.k.

Mkuu wa Idara ya Maendeleo ya Jamii Manispaa ya Kigamboni Happy Luteganya amesema kwamba wataalamu wa maendeleo wapo kuanzia ngazi ya Kata ambapo elimu ya uandaaji wa vikundi namna ya miradi yenye tija inatolewa kwa wanavikundi kabla ya kupewa mikopo, ikiwa ni pamoja na kuwapa elimu ya mafunzo ya ujasiriamali kwa vikundi vyote vilivyokidhi sifa, namna ya kutunza kumbukumbu, usimamizi wa miradi na utafutaji wa masoko.

Afisa maendeleo ameendelea kwa kusema baada ya kupewa mikopo vikundi hivi vinakuwa kwenye usimamizi wa karibu ili kuona mikopo waliyopewa inaenda kutumika kwenye miradi waliyoomba na kuleta tija.

Mbali na changamoto ya urejeshaji wa mikopo kwa baadhi ya vikundi hususani vya vijana na watu wenye ulemavu Afisa Maendeleo ya Jamii bado anahamasisha wananchi kujitokeza kwa wingi kuunda vikundi vitakavyowawezesha kupata mikopo isiyo na riba ili kuepukana na mikopo mingine yenye riba kubwa zinazowafunga kwenye kutimiza malengo yao.