Tekelezeni miradi kwa thamani na kuwajali wananchi – Dkt. Mpango

Imewekwa tar.: July 21st, 2022

Na Fred Kibano, Mpanda na Mlele, Katavi

Serikali imewataka Viongozi nchini kutekeleza miradi ya maendeleo kwa thamani ya fedha, kuwajali wananchi na kuacha ubadhilifu katika miradi wanayoisimamia.

Kauli hiyo ya Serikali imetolewa na Makamu wa Rais wa Tanzania Mhe. Dkt. Philip Mpango baada ya kupokea taarifa ya mkoa wa Katavi katika Manispaa ya Mpanda na kufanya ziara yake Mpanda Manispaa na Halmashauri ya Mlele mapema leo.

“Ni wajibu wetu kama Viongozi kuhakikisha katika ngazi zote fedha za miradi zinaenda kunufaisha wananchi, huo ni wajibu wa msingi ni lazima kama Viongozi kuwiwa na umasikini wa wananchi wetu kwa kufanya jitihada kwelikweli”

Dkt. Mpango amefurahishwa na taarifa kubwa ya maendeleo ambayo yamefikiwa na mkoa wa Katavi lakini amewataka watendaji hao kuweka viwango sahihi vya makadirio ya mapato, kutekeleza miradi katika ubora na kiwango kinachostahili pamoja na kuacha matumizi yasiyosahihi kwa fedha zilizokusanywa na Mamlaka husika.

“nimefurahishwa na makusanyo ya mapato lakini mwangalie malengo yenu mnayoyakadiria  kwani lengo la madirio linaweza kuwa dogo, kwenye mapato hapa ni muhimu kusimamia matumizi, sijui natumaini hakuna mchwa hapa kwenye Halmashauri zetu , tutakuwa tunakusanya huko kwa wananchi lakini huku kwingine zinavuja “ alisema Mhe. Mpango.

Awali akisoma taarifa ya mkoa, Mkuu wa Mkoa Katavi Mwanamvua Mlindoko amesema pamoja na kuvuka lengo la makusanyo katika mwaka wa fedha 2021/2022 kwa kukusanya shilingi Bilioni 13.54 sawa na asilimia 115 lakini Ofisi yake inaendelea kusimamia ukusanyaji wa mapato hayo ya Serikali kwenye Halmashauri zote za mkoa huo pamoja na kuhakikisha fedha zilizokusanywa kwa ajili ya kutekeleza miradi zinapelekwa kwenye miradi inayowanufaisha wananchi.

Akitoa neno la awali katika ziara ya Makamu wa Rais Dkt. Philip Mpango Inyonga - Wilayani Mlele, Mbunge wa Mlele Mhandisi Isack Kamwelwe ameishukuru Serikali kwa kuwapatia jumla ya watumishi 92 ambapo walimu 46 na wauguzi 46 lakini pia ameiomba Serikali kuendeleza ujenzi wa madarasa 8 katika shule ya msingi iliyopo Kata ya Nsengwa kwani mwaka huu ilipata changamoto ya kuandikisha wanafunzi 700 lakini ni 250 tu ndiyo walipata nafasi ya madarasa ya kusomea.

Naye mwananchi Sailoni Mhagama amesema ziara ya Makamu wa Rais Mkoani Katavi itatatua changamoto ambazo wanakabiliwa nazo wao wananchi kama vile afya na elimu.