TAMISEMI QUEENS Mabingwa Ligi ya Muungano

Imewekwa tar.: November 21st, 2019

Waziri wa Nchi Ofisi ya Rais TAMISEMI Mhe. Selemani Jafo amewapongeza wachezaji wa timu ya mpira wa pete ya Ofisi ya Rais Tawala za Mikoa na Serikali za Mitaa (OR TAMISEMI) kwa kutwaa ubingwa wa Ligi ya Muungano kwa kuichapa Mbweni JKT kwa mabao 40 kwa 32 mwishoni mwa wiki.

Akiongea Jijini Dodoma wakati akipokea timu hiyo waziri Jafo ameipongeza timu hiyo kwa kufikia malengo yake na amezitaka timu mbalimbali zinazonyemelea vipaji vya wachezaji waliopo timu ya mpira wa pete Ofisi ya Rais TAMISEMI zijitokeze kuwachukua wachezaji hao lakini ni lazima wafuate taratibu ili kujua mustakabali wa maisha ya wachezaji hao kwani ofisi yake inalea vipaji vya wachezaji na wafanyakazi ili kuviendeleza kwa maslai yao na Serikali.  

“wachezaji wetu mmenipa faraja inayopitiliza, sisi ni mabingwa wa Muungano, kwa hayo machache, nimefarijika sana, tumepata ubingwa lakini kizuri zaidi wachezaji bora wa michezo hii wametoka Ofisi ya Rais TAMISEMI”

Aidha, Jafo amesema ushindi huo ni ushindi wa Mhe. Rais Dkt. John Pombe Joseph Magufuli ambaye ndiye waziri Mwenye dhamana na Ofisi ya Rais TAMISEMI kwani timu hii ipo katika ofisi yake na matarajio ya ofisi ni kucheza kombe la mabara baada ya kuifanya timu ya TAMISEMI QUEENS kuwa timu ya Taifa.

Naibu Katibu Mkuu OR – TAMISEMI Bw. Gerald Mweli amesema ofisi itayafanyia kazi maagizo yote ya Serikali ili timu ya mpira wa pete iweze kufanya vizuri zaidi.

Naye mwalimu wa timu ya TAMISEMI QUEENS Bi. Maimuna Kitete amesema mafanikio yao ni kutokana na wachezaji wake kujiandaa na kucheza kama timu kama alivyokuwa amewaandaa kushinda michuano ya Kombe la Muungano na ushirikiano mkubwa wa uongozi wa OR-TAMISEMI. Aidha, amesema TAMISEMI Queens walikabidhiwa kikombe cha ubingwa pamoja na  kutoa mchezaji bora (MVP) na mchezaji bora wa katikati (center).

Kwa upande wake Mwenyekiti wa TAMISEMI sports Filbert Lwakilomba amesema wanazo changamoto kadhaa zikiwemo kutokujitokeza kwa wagombea wakwenye uchaguzi wa Viongozi wa michezo lakini pia wachezaji kuwajibika katika vituo vyao vya kazi na pia kutokuwa na kambi ya muda mrefu na hivyo kupelekea kufanya timu hiyo kuwa na matokeo yasiyoridhisha ukilinganisha na timu za majeshi ambazo wachezaji kazi yao ni moja tu ya michezo.

Timu ya Mpira wa Pete ya Ofisi ya Rais Tawala za Mikoa na Serikali za Mitaa (TAMISEMI Queens) ilifanikiwa kutwaa ubingwa wa michuano ya Ligi ya Muungano Visiwani Zanzibar mwishoni kwa kuisambaratisha timu ya Mbweni JKT kwa jumla ya magoli 40 kwa 32 katika mchezo wa fainali uliopigwa katika viwanha vya Gymkana Kisiwani Zanzibar.

TAMISEMI Queens ilishinda michezo yote mpaka kufika fainali na kutwaa ubingwa ikiwa imepangwa kundi B ikiwa na timu za Eagle ya Jijini Dar es salaam, Mafunzo ya Zanzibar, Mbweni JKT, Makutupora kutoka Dodoma na Zimamoto ya Zanzibar. Jumla ya timu 11 zilishiriki ambapo kuni A zikiwa timu 5 na kundi B timu 6.

       Anaandika OR - TAMISEMI Fred Kibano