Shule ya Msingi Nkuhungu yapewa siku 14 kukarabatiwa

Imewekwa tar.: January 20th, 2021

Na Atley Kuni, Dodoma

Waziri wa Nchi Ofisi ya Rais, Tawala za Mikoa na Serikali za Mitaa Mhe. Selemani S. Jafo ameuagiza uongozi wa Jiji la Dodoma kufanya ukarabati wa Shule ya Msingi Nkuhungu iliyopo katika Jiji hilo ndani ya siku 14 ili kumaliza adha ya wanafunzi kusoma katika mazingira yasiyo rafiki kwao.

Waziri Jafo amefikia hatua hiyo hii leo tarehe 20 Februari, 2021 alipofanya ziara katika shule hiyo ambapo ilimlazimu kutoa maelekezo ya awali, alipovinjari darasa la awali na kukuta halina paa wala michoro ambayo ingeweza kuwasaidia Watoto kujifunza kwa weledi.

“Hili ni darasa la awali nilitegemea nikiingia humu, nione michoro ya aina mbalimbali ambayo inamsaidia Mwalimu anapofundisha na pia inakuwa rahisi kwa mtoto kujifunza kwa wepesi. Sasa naagiza darasa hili likarabatiwe kwa kupigwa plaster, na rangi lakini pia ichorwe michoro ya vitu mbali mbali” alisema Jafo.

Akiwa anaendelea na ziara yake katika shule hiyo, alilazimika kufanya kikao cha pamoja cha Walimu na Wanafunzi, ambapo alijitolea kuwa mlezi wa shule hiyo na kuutaka uongozi ufanye marekebisho kwenye vyumba 16 vilivyojengwa pamoja na darasa moja lililojengwa na Mbunge wa Jimbo la Dodoma Mjini Antony Mavunde.

“Lakini agizo langu mimi nataka  mkamilishe ukarabati wa shule hii, nawapa wiki mbili  mimi nitarudi hapa tena tarehe 20 Februari,2021, kwa ajili ya kuona ukarabati uliofanyika, maana hapa mkijipanga vizuri sio zaidi ya shilingi milioni 25 mtabadili kabisa mazingira ya kufundushia na kujifunzia Amesema Jafo.

Awali akisoma taarifa ya shule, Mkuu wa Shule ya Msingi Nkuhungu, Bernard Chanai, amesema kutokana na wingi wa wanafunzi katika shule yao, mpango uliopo sasa ni kujenga shule mpya mbili katika eneo la Ndachi ili kupunguza idadi ya wanafunzi na kufikia lengo la kisera la kuwa na wanafunzi 915 kwa shule.

Chanai amesema, Serikali ya awamu ya tano kupitia Halmashauri ya Jiji la Dodoma, walitoa shilingi milioni 545 ikiwa ni mpango wa ndani wa mwaka wa fedha, 2018/19 na 2020/21, fedha ambazo zinafanikisha ujenzi wa shule za Mnyakongo na Mtupe ambazo kila moja imeanza kwa kujengewa vyumba 10 vya madarasa, Matundu 9 ya vyoo sambamba na ujenzi wa jengo la Utawala, ikiwa ni mkakati wa Jiji kukabiliana na wingi wa wanafunzi.

Wakati huo huo Waziri Jafo ametembelea Shule ya Sekondari ya Itega, ambapo akiwa shuleni hapo alionekana kukerwa na hali ya matokeo mabovu ya kidato cha Nne kwa mwaka uliopita, kufuatia shule hiyo kutopata ufaulu wa daraja la kwanza mbali ya shule husika kuwa eneo la mjini.

“Hapa ni mjini miundombinu yote mnayo, mnashindwa vipi na shule nyingine zipo kijijini kabisa, suala hili halikubaliki, lazima muongeze bidii katika kufundisha” aliuambia uongozi wa Shule hiyo pamoja na Walimu.

Kwa Mujibu wa taarifa iliyotolewa mbele ya Waziri Jafo, Ufaulu katika Shule ya Sekondari Itega, unaonesha ufaulu kwa mwaka ulipita, ulianzia daraja la pili ambapo ilikuwa ni wanafunzi 3, daraja la tatu wanafunzi 14, daraja la Nne, wanafunzi 62 na sifuri ilikuwa wanafunzi 25.

Akitoa Salamu za Mkoa wa Dodoma, Mkuu wa Mkoa huo Dkt. Benelith Mahenge, alisema mkoa umeendelea kujidhatiti katika suala la elimu kwa kila Wilaya na masuala mengine ya kiuchumi pamoja na suala la ulinzi na usalama.

Waziri Jafo, alikuwa katika ziara ya siku moja katika Wilaya ya Dodoma na Halmashauri ya Jiji la Dodoma kwa ujumla ikiwa ni muendelezo wa ziara zake za kikazi kote nchini.

Wanafunzi wa Shule ya Msingi Nkuhungu, wakimsikiliza Waziri Jafo, alipo tembelea shule hiyo na kuzumza nao, hayupo pichani

Mhe. Waziri Jafo akiwa picha ya pamoja na wanafunzi wa shule hiyo.