Shilingi milioni 150 kukamilisha maboma ya zahanati Busega

Imewekwa tar.: April 29th, 2021

Na Mathew Kwembe, Dodoma

Serikali imeipatia Halmashauri ya Wilaya ya Busega shilingi milioni 150 kwa ajili ya kukamilisha maboma ya Zahanati za Imalamate, Ijutu na Busami ili kuboresha huduma za afya katika wilaya hiyo.

 Akijibu swali la Mbunge wa Busega Mhe. Simon Songe Lusengekile, bungeni leo jijini Dodoma, Naibu Waziri Ofisi ya Rais, TAMISEMI, Mhe. Festo Dugange amesema kiasi hicho cha fedha kilipelekwa katika halmashauri hiyo mwezi februari mwaka huu.

Amesema mwezi huo huo wa februari mwaka huu Serikali imeipatia Halmashauri hiyo Shilingi milioni 500 kwa ajili ya ujenzi wa wodi 3 katika Hospitali ya Halmashauri na imetenga Shilingi milioni 500 katika bajeti ya mwaka wa fedha 2020/21 kwa ajili ya ununuzi wa vifaa tiba katika Hospitali hiyo.

Dkt Dugange amefafanua kuwa katika mwaka wa fedha 2018/19 Serikali iliipatia Halmashauri hiyo Shilingi bilioni 1.8 kwa ajili ya ujenzi wa Hospitali ya Halmashauri na katika mwaka wa fedha 2017/18 Serikali iliipatia Halmashauri ya Wilaya ya Busega Shilingi milioni 250 kwa ajili ya ukarabati wa Kituo cha Afya Nasa na kukiwezesha kuanza kutoa huduma za dharula za upasuaji.

Naibu Waziri amesisitiza kuwa serikali itaendelea kujenga na kukarabati miundombinu ya kutolea huduma za afya nchini ikiwemo Halmashauri ya Wilaya ya Busega kwa kadri ya upatikanaji wa fedha.