Serikali Yaagiza Waganga Wakuu wa Wilaya Kusimamia Ujenzi Vituo vya Afya

Imewekwa tar.: November 17th, 2018

Naibu Waziri, Ofisi ya Rais, Tawala za Mikoa na Serikali za Mitaa (TAMISEMI) anayeshughulikia afya Mhe. Josephat Kandege amewataka Waganga Wakuu wa Wilaya kusimamia ujenzi wa vituo vya afya na siyo kuziachia kamati za ujenzi pekee.

Mhe Kandege ameyasema hayo leo kwenye ziara ya Kamati ya Kudumu ya Bunge ya Hesabu za Serikali pamoja na Kamati ya TAMISEMI ya kutembelea kituo cha afya Mlali killichopo wilaya ya Kongwa.

“Nyie ndiyo wataaluma mnajua ni jinsi gani majengo ya afya yatakiwa kuwa, sasa mkiwaachia wahandisi au kamati za ujenzi mnakuja kugundua makosa mengi sana baadye, na kufanya marekebisho ni gharama nyingine” Alisema Mhe. Kandege na kuongeza.

“Lakini pia nazipongeza kamati zote, ni matumani yangu kuwa mkimaliza hapa mtakuwa mmepata picha halisi itakayoonyesha taswira ya ujenzi na ukarabati wa vituo vya afya unaoendela nchi nzima” Alisema Mhe. Kandege.

Kwa upande wake Naibu Katibu Mkuu anayeshughulikia afya-TAMISEMI, Dr. Zainab Chaula amesema kituo hicho ambacho ujenzi wake upo katika hatua za mwisho kilipewa kiasi cha shilingi milioni 400 tofauti na vituo vingine vilivyopewa shilingi milioni 500.

Mwenyekiti wa Kamati ya Kuduma ya Hesabu za Serikali Naghenjwa Kaboyoka mbali na kusifu jitihada zilizofanywa na serikali lakini pia alishauri kufanyika kwa marekebisho madogo yaliyobainika.

“Nasema kutoka moyoni, kweli Rais anastahili pongezi, hata jana nilisema haya tulipotembelea Bahi na Manispaa, na hapa pia napongeza, hizi kasoro ndogondogo nimeambiwa zilishaonekana na tayari mpo kwenye hatua za kufanya marekebisho, naomba yafanyike kama mlivyoshauriwa” Alisema Mhe. Kaboyoka.

Kamati hizo zimemaliza ziara ya siku mbili ya kutembelea vituo vya afya vilivyopo wilaya za Bahi, Chamwino, Kongwa pamoja na Manispaa ya Dodoma.

        Anaandika Zulfa Mfinanga,