Serikali yaagiza ujenzi wa shule 232 za sekondari kukamilika kwa wakati

Imewekwa tar.: November 9th, 2022

Na Fred Kibano

Waziri wa Nchi, Ofisi ya Rais - TAMISEMI Angellah Kairuki ametoa maagizo kwa Wakuu wa Mikoa na Wilaya nchini kuhakikisha ujenzi wa miundombinu ya shule za Sekondari 232 unakamilika kwa wakati.

Waziri Kairuki ametoa kauli hiyo wakati akifungua Mkutano Mkuu wa nne wa Umoja wa Walimu Wakuu wa Shule za Msingi Tanzania Bara, leo tarehe 09 Novemba, 2022 katika Ukumbi wa Masista wa Shirika la Ivrea Jijini Dodoma.

Waziri Kairuki amesema Wakuu wa Mikoa na Wilaya wahakikishe Wakurugenzi wa Halmashauri wanakamilisha ujenzi wa madarasa 8,000 yenye thamani ya shilingi milioni 470 kwa kila shule ya sekondari unakamilika kabla au ifikapo tarehe 15 Disemba, 2022 ili kuwezesha wanafunzi wote watakaofaulu mtihani wa kumaliza elimu ya msingi 2022 wanajiunga na Kidato cha kwanza Januari, 2023.

Aidha, amesema kupitia mwaka huu wa fedha 2022/2023, Serikali kupitia mradi wa BOOST itajenga zaidi ya madarasa 9,000 nchini kote na kutoa rai kwa wajumbe wa kikao pindi mradi huo utakapofika katika maeneo yao kuhakikisha wanasimamia ujenzi na ukarabati wa shule za msingi kwa mujibu wa Sheria, Kanuni na Taratibu ili Serikali iweze kufikia malengo yaliyokusudiwa na serikali.  

“Serikali imezindua mradi mpya utakaotekelezwa kwa miaka 5 wa kuboresha upatikanaji wa fursa sawa katika ujifunzaji bora wa Elimu ya Awali na Msingi, Tanzania Bara (BOOST) kwa gharama ya shilingi 1.15 Trilioni, mojawapo ya afua zitakazotekelezwa kupitia mradi huu ni ujenzi wa vyumba vya madarasa na matundu ya vyoo katika shule za msingi zenye uhitaji mkubwa zaidi” amesema Kairuki.

Akiongea katika mkutano huo akimkaribisha mgeni rasmi, Naibu Katibu Mkuu (ELIMU) Ofisi ya Rais - TAMISEMI Dkt. Charles Msonde amewapongeza Viongozi hao kwa kuendelea kuunga mkono juhudi za Serikali kwa kusimamia miradi mikubwa ya Kukuza Stadi za Kujua Kusoma na Kuandika (GPE LANES) na Lipa Kulingana na Matokeo (EP4R) katika maeneo yao lakini pia kusimamia madarasa 15,000 ya shule za msingi na madarasa ya shule shikizi mwaka 2021.

Awali akitoa hotuba kabla ya mgeni rasmi, Rehema Ramole Mwenyekiti wa TAPSHA Tanzania Bara ameishukuru Serikali kwa kuendelea kutoa posho kila mwezi kwa Walimu Wakuu lakini pia wanakabiliwa na changamoto ya kutengewa fedha kidogo za ujenzi ambazo hazitoshelezi kumaliza miradi wanayopewa, mlundikano wa wanafuzi na pia kuingiliwa na Maafisa wa Halmashauri kwenye michakato ya miradi ya ujenzi.

Naye Mdachi Mwanyani Mwenyeviti wa TAPSHA Halmashauri ya Chalinze amesema mkutano huo utamsaidia kutatua changamoto ya matumizi ya fedha, matumizi ya ‘force account’ na ujenzi wa madarasa chini ya Mradi mpya wa Boost.

Mkutano huo una kauli mbiu yake inayosema: “Ongezeko na Uboreshaji wa Miundombinu ya Elimu nchini unaimarisha Ufundishaji na Ujifunzaji pamoja na kuchochea ongezeko la Uandikishaji wa wanafunzi”