Serikali yaagiza uchunguzi ujenzi wa Hospitali ya Wilaya Bariadi

Imewekwa tar.: December 22nd, 2021

Na Fred Kibano, Bariadi               

Serikali imemwagiza Katibu Tawala Mkoa wa Simiyu na Mkurugenzi wa Halmashauri ya Wilaya ya Bariadi kufanya uchunguzi wa ujenzi wa majengo matatu ambayo hayajakamilika bila sababu maalum kwa miezi tisa bila sababu ya msingi.

Dkt. Dugange ametoa agizo hilo alipofanya ziara yake ya kikazi katika Halmashauri ya Wilaya ya Bariadi hivi leo baada ya kukagua ujenzi wa miundombinu hiyo na kunusa harufu ya ubadhirifu wa fedha.

Majengo hayo ni wodi ya wanaume, wodi ya watoto na wodi ya wanawake ambayo yalipaswa kuwa katika hatua ya kutumika lakini mpaka sasa bado hayafikia hatua ya kupiga lipu.

“sasa natoa maelekezo kwanza Mkurugezi, Katibu Tawala Mkoa fanyeni ukaguzi maalum wa ujenzi wa wodi hizi tatu tuone fedha nyingine ambazo zilitakiwa kufanya kazi hapa zimekwenda wapi, na ndani ya siku 30 ifikapo 30 Januari, 2022 Ofisi ya Rais TAMISEMI tupata riPoti maalum ya hali ya fedha ikoje, matokeo yake yakoje na hatua gani zimechukuliwa kwa wale wote ambao watahusika kuhusika kwenye usimamizi mbaya wa fedha za Serikali kwa majengo ya wodi hizi” alisema Dkt. Dugange

Alisema haiwezekani Serikali itoe fedha nyingi na wananchi wa Bariadi walitarajia kupata huduma bora kwenye hospitali hiyo kama ingekamilika kwa wakati.

Dkt. Dugange amesema zaidi ya asilimia 99 ya Halmashauri zote 67 zilizopatiwa fedha zilikwishakamilisha ujenzi wa majengo hayo matatu na yameanza kutoa huduma lakini wilaya ya Wilaya ya Bariadi majengo hayo hayajakamilika takribani miezi tisa tangu tarehe ya kukabidhi mradi.

“hatuoni thamani ya fedha iliyotumika kwenye majengo haya kwa hiyo hapa kuna kila dalili fedha hizi zimetumika vibaya, hazijatumika kadri zilivyotarajiwa kutumika kujenga wodi hizi tatu kwa lugha nyingine hapa kuna upotevu wa fedha za Serikali” alisema Dkt. Dugange.

Awali akitoa taarifa hiyo ya ujenzi wa majengo hayo, Dkt. Joseph Mziba amesema hospitali hiyo ilipokea fedha kiasi cha shilingi 482,770,573.00 kwa ajili ya ujenzi wa majengo ya wodi hizo tatu na mpaka sasa wanatarajia kuanza kupiga lipu. Aidha, hospitali hiyo ina jumla ya watumisha 49 na makusanyo ya mapato ni shilingi milioni tatu kwa mwezi.

Mkuu wa Wilaya ya Bariadi Mheshimiwa Lupakisyo Kapage, amesema kuwa maagizo yote wameyapokea na watayafanyia kazi kama ilivyoagizwa.

Hospitali ya Wilaya ya Bariadi ilipatiwa fedha kutoka Serikali Kuu kiasi cha shilingi Bilioni mbili na milioni 282 ambapo hatua iliyofuata ililetewa shilingi milioni 482 kwa ajili ya ujenzi wa wodi tatu za wanaume, watoto na wanawake ambazo ujenzi wake unasuasua.