“PS3 plus” Yarudi kwa kishindo, Bilioni 114 kuwezesha Mifumo Sekta ya umma nchini

Imewekwa tar.: January 16th, 2021

Na Fred Kibano, Dodoma

Jumla ya dola za kimarekani milioni 49.9 sawa na shilingi Bilioni 114.7 za kitanzania zimetengwa na Mradi wa Uimarishaji Mifumo ya Sekta za Umma (‘Public Sector Strengthen Programme awamu ya pili PS3 Plus) kwa kipindi cha miaka 5 kuanzia mwezi Julai, 2020 hadi Julai, 2025, ili kuendelea kufanya kazi na Serikali kama sehemu ya wadau wa maendeleo wanaoshirikina na Serikali kwa karibu.

Akiongea wakati wa ufunguzi wa kikao kazi cha siku mbili kilichofanyika Jijini Dodoma jana na kuwahusisha wataala wa Habari kutoka TAMISEMI, Wizara ya Afya na Kilimo, Mkurugenzi wa Tathmini, Ufuatiliaji na Mafunzo kutoka Mradi wa PS3 Bw. Kusekwa Sono, amesema lengo la mradi huo ni kuimarisha mifumo inayosaidia utoaji bora wa huduma kwa wananchi na wadau matahalani kama uimarisha ukusanyaji wa mapato ya Serikali kwa njia ya kieletroniki nk.

Alisema katika kipindi cha miaka mitano iliyopita mradi ulijikita kuimarisha mifumo ya Ofisi ya Rais Tawala za Mikoa na Serikali za Mitaa hususani kwenye Mikoa yake 13 na Halmashauri 93 ya Tanzania Bara.

“Lakini katika katika awamu hii ya pili mradi utafanya kazi kwenye mikoa yote 26 Tanzania Bara pamoja na Zanzibar na Halmashauri zake, Wizara za Elimu, Sayansi na Teknolojia, Wizara ya Kilimo, na Wizara ya Afya, Maendeleo ya Jamii, Jinsia, Wazee na Watoto,” alisema.

Akiwasilisha mada katika kikao hicho, Mkuu wa Kitengo cha Mawasiliano Serikalini Ofisi ya Rais TAMISEMI, Nteghenjwa Hosseah amesema matarajio ya ofisi ni kuendelea kuwajengea uwezo Maafisa Habari wa Mikoa na Mamlaka za Serikali za Mitaa, kuboresha Tovuti, kufanya mapitio ya mkakati wa mawasiliano wa wizara, kuwa na mwongozo maalum wa hati miliki, uanzishwaji wa studio ya wizara, jarida la mifumo yetu, kuwa na siku ya Tuzo za waandishi wa Habari za jarida la ‘Mifumo Yetu’

Baadhi ya kazi zilizofanyika katika kipindi cha miaka mitano ya mradi huo kwenye eneo la mawasiliano ni uanzishwaji wa tovuti za Mikoa, Halmashauri pamoja na Wizara na wadau wake, mafunzo ya uandishi wa Habari za mitando na taarifa za tovuti kwa Maafisa Habari kote nchini.

Kurejea kwa wadau wa maendeleo hao kutatoa wigo wa Ofisi ya Raie-TAMISEMI, pamoja na Wizara zingine za kisekta kuendelea kuwahudumia watanzania katika Nyanja mbalimbali.

Mwisho