MRADI WA SHULE BORA KUNUFAISHA WANAFUNZI MIL. 4 NCHINI

Imewekwa tar.: April 5th, 2022

Serikali ya Tanzania kwa kushirikiana na Serikali ya Uingereza wamezindua mpango wa elimu bunifu wa shule bora wenye thamani ya Shilingi bilioni 271 utakaosaidia kuboresha mazingira ya kujifunzia, ujumuishi na usalama kwa wasichana na wavulana katika shule za msingi nchini.

Akizungumza baada ya kuzindua mpango huo, Waziri wa Uingereza anayeshughulikia masuala ya Afrika,Latini Amerika na Caribean, Mhe. Vicky Ford amefurahia kwa kufanikishwa kwa mchakato huo akasema ni mwanzo mzuri mpya wa muendelezo wa ushirikiano katika sekta ya elimu kati ya Serikali ya Uingereza na Tanzania.

Amesema mradi huo utawanufaisha wanafunzi milioni 4 katika mikoa hususani ni watoto wa Kike, wenye mahitaji maalum na wale wanaotoka kwenye mazingira magumu na hatarishi.

"Mradi wa shule bora unakwenda pamoja na mfumo wa elimu wa Tanzania ili kuwasaidia wanafunzi na walimu katika kuwajengea uwezo.Mpango wa shule bora utatoa fursa hata kwa wale wanafunzi wenye mahitaji maalumu," amesema Vicky Ford.

Naye, Waziri wa Elimu Sayansi na Teknolojia Profesa Mkenda amesema mradi huo utatekelezwa katika mikoa tisa na utaboresha mazingira ya ufundishaji wa darasani pamoja kuwaendeleza walimu ili kutekeleza majukumu yao kwa ufanisi.

Kwa upande wa TAMISEMI, Naibu Waziri anayesghulikia Elimu Mhe. Davidi Silinde amesema," jukumu langu ni kuishukuru Serikali ya Uingereza na tunakushuru waziri ( Vicky) kwa ujio wako Tanzania na hatua ya Serikali yako kutuwezesha kuboresha sekta ya elimu nchini.

" Ahadi yetu ni fedha zote zitakazoletwa zitatumika malengo yaliyokusudiwa," amesema Silinde.

Uzinduzi wa mradi huu umefanyika tarwhw 04.04.2022 katika shule ya msingi ya Mkoani iliyopo kwenye Halmashauri ya Mji wa Kibaha Mkoani Pwani na kuhudhuriwa na viongozi mbalimbali waandamizi wa Serikali akiwemo Waziri wa Elimu, Sayansi na Teknolojia Mhe. Prof. Adolf Mkenda, Naibu Waziri wa Tamisemi, Mhe. David Silinde na Naibu Katibu Mkuu wa Tamisemi anayeshughulikia elimu, Gerald Mweli.

Wengine ninMkuu wa Mkoa wa Pwani Mhe. Abubakar Kunenge, makatibu wa tawala wa mikoa ya Simiyu, Katavi, Kigoma, Tanga, Mara, Rukwa, Singida na Dodoma ambako mradi huo utatekelezwa, maafisa Elimu wa Halmashauri za Mkoa wa Pwani pamoja walimu na wanafunzi wa shule ya msingi Mkoani.