Mbeya waanza vema Mashindano ya UMISSETA

Imewekwa tar.: June 10th, 2019

Na Mathew Kwembe, Mtwara

Timu ya soka ya mkoa wa Mbeya kwa upande wa wavulana imeanza vema mashindano ya kitaifa ya Umoja wa Shule za Sekondari Tanzania (Umisseta) mwaka huu baada ya kuifunga timu ya mkoa wa Dar es salaam kwa goli moja kwa bila.

Goli pekee la mchezo huo lilifungwa na mshambuliaji Amon Mwakitalu ambaye ni mwanafunzi wa kidato cha nne wa shule ya sekondari ya Ikolo iliyopo Kyela.

Akizungumza mara baada ya mchezo huo, kocha wa timu ya Mbeya Mwalimu Emanuel Mwakaselo alielezea kufurahishwa na matokeo hayo ambapo alisema kuwa yametokana na maandalizi mazuri yaliyofanywa na vijana wake.

Amesema vijana wake walifanya maandalizi ya kutosha kwa ajili ya mashindano hayo ambapo kutokana na hali ya hewa ya mbeya kuwa tofauti na hali ya hewa ya Mtwara walilazimika kufanya mazoezi hayo mchana kwenye jua kali.

“Hata hivyo upepo mkali umetuathiri sana kwenye mchezo wa leo lakini tumejiandaa vizuri na tunatarajia tutafanya vizuri,” alisema mwakaselo

Mashindano ya UMISSETA mwaka huu yamefunguliwa rasmi leo na Waziri Mkuu Kassim Majaliwa ambapo jumla ya wanafunzi 3,304 kutoka mikoa 26 ya Tanzania Bara na miwili ya Zanzibar wanashiriki michezo hiyo.

Mashindano ya UMISSETA yaliyoanza leo yatafanyika kwa muda wa  wiki mbili na yanatarajiwa kukamilika tarehe 21Juni mwaka huu na yatafungwa na Waziri wa Elimu, Sayansi, Teknolojia na Mafunzo ya Ufundi, Prof Joyce Ndalichako.