Maelekezo ya Rais wa Jamhuri ya Muungano wa Tanzania Mhe. Samia Suluhu Hassan kwenye Ufunguzi wa Mkutano Mkuu Maalum wa Jumuiya ya Tawala za Mitaa Tanzania - ALAT Tarehe 27.09.2021.

Imewekwa tar.: October 2nd, 2021

“Maagizo yangu kwa ALAT ni kutumia mifumo katika kazi zenu, kutoa taarifa za Serikali za Mitaa, kukusanya mapato, kuweka rekodi za huduma zinazotolewa kwa wananchi."

“Kwenye bajeti ya mwaka huu wa fedha serikali imeridhia madiwani kulipwa posho ya kila mwezi. Hii itasaidia madiwani kuacha kuhangaika na vile vijifedha vinavyolipwa uko Halmashauri na kile ambacho mtakiacha,tunataka kikatumike kwenye miradi ya maendeleo."

“Tutaendelea kuangalia maslahi ya madiwani na watendaji wengine kwenye Halmashauri zetu, serikali imeridhia madiwani kulipwa posho kila mwezi na hii itasaidia madiwani kuacha kuhangaika na vile vijifedha vinavyokusanywa kule kujilipa posho"

"Kuna baadhi yenu hamuheshimiani, hamusikilizani nendeni mkaheshimiane,DC anasema hili DAS  anasema hili, Meya anasema hili DED anasema hili mwingine anasema hili, mnavutana kwasababu fedha zinapoingia kila Mtu anataka amege fungu atie mfukoni mmoja akikataa mivutano inaanza hili tabia ife mkafanye kazi kwa umoja.

“Niwaambie nina kifedha kingine nimekipata pahali, tunakwenda kumaliza madarasa yote yanayotakiwa, nimeambiwa kuna uhaba wa madarasa elfu 11, lakini fedha tuliyoipigia mahesabu itajenga madarasa elfu 15 ili January watoto wote waingie shule"

“Katika mkutano mmoja nilisema sitaki kuona mabango yenye masikitiko, yenye shukrani wacha wananchi waandike, mabango yenye masikitiko ni kwa sababu viongozi kwenye Mamlaka za Serikali za Mitaa hamfanyi kazi yenu, baadhi yenu ni sehemu ya kero, Katatueni kero za Wananchi"

“Ofisi ya Rais-TAMISEMI imekuwa ikiongoza kwa kutengewa fedha nyingi, kwa mfano katika bajeti ya mwaka huu wa fedha TAMISEMI imetengewa kiasi cha shilingi Trilioni 7.3 takribani asilimia 20 ya bajeti yote ya serikali Ili waweze kutatua changamoto za wananchi"

“Kubwa ninalogomba kwenu ni thamani ya pesa kwenye miradi, juzi Waziri Mkuu alipelekwa kwenye kibanda kilichojengwa kwa milioni kadhaa ukikitizama na fedha zilizotajwa ni tofauti, kimepakwa rangi lakini ni kibanda ambacho kingejengwa kwa Milioni 3"

“ALAT ningependa tusimamie makusanyo ndani ya Halmashauri zetu na matumizi ya fedha serikali za mitaa wamekuwa watumiaji wazuri wa fedha, lakini kinachotoka kwenu kuja serikali kuu ni kidogo aidha hakikusanywi au kikikusanywa kinaishia huko huko"

Mhe. Samia Suluhu Hassan

Rais wa Jamhuri ya Muungano wa Tanzania

27.09.2021