Maafisa Tarafa na Watendaji wa Kata watakiwa kutoa huduma kwa haki na kuwa waadilifu

Imewekwa tar.: August 12th, 2024

Na OR TAMISEMI, Kilimanjaro

Mkuu wa Mkoa wa Kilimanjaro Mheshimiwa Nurdin Hassan Babu amefunga mafunzo kwa Maafisa Tarafa na Watendaji wa Kata wa mkoa wa Kilimanjaro na kuwataka kuwa waadilifu.  

Mheshimiwa Nurdin Babu ametoa agizo hilo leo tarehe 12 Agosti, 2024 Ofisini kwake wakati akifunga mafunzo ya kuwajengea uwezo Maafisa Tarafa na Watendaji wa Kata wa Mkoa wa Kilimanjaro na kuwaagiza Viongozi na Watendaji hao kutoa huduma kwa haki na kuwa waadilifu.

“ndugu wanamafunzo, Viongozi nyie ni watumishi wa Umma, mnapaswa kutambua kwamba mnawajibu wa kutoa huduma bora kwa wananchi, kufahamu vyema na kuzingatia kanuni za kimaadili, kutumia misingi ya haki badala ya upendeleo kwa wananchi na nyie ni kioo cha jamii” alisema Mheshimiwa Nurdin Babu.

Aidha, Mheshimiwa Babu amewataka kupendana na kusaidiana katika utekelezaji wa majukumu yao lakini kuwa mfano mzuri kwa wananchi wanaowaongoza kwenye maeneo yao ya kazi.

Katika hatua nyingine, Babu amewataka kuongeza kasi ya kuzuia mianya ya upotevu wa mapato ya Halmashauri zao kwani bado wapo baadhi ya watumishi wanaotumia fedha mbichi ambazo bado hazijafika benki wakati mifumo yote ya fedha kuanzia hatua ya kukusanya wanayo, kwani bila kufanya hivyo mapato hayataongezeka pamoja na kwamba Halmashauri za mkoa huo zimekusanya mapato kwa zaidi ya asilimia mia moja.

Naye Ibrahim Minja Mkurugenzi Msaidizi Idara ya Tawala za Mikoa Ofisi ya Rais TAMISEMI amesema mafunzo kwa Maafisa Tarafa na Watendaji wa Kata ya kuwajengea uwezo katika awamu hii ya mwisho inahusisha mikoa nane ya Manyara, Arusha, Mbeya, Ruvuma, Kilimanjaro, Tanga, Morogoro na Iringa na mikoa iliyobakia ni Tanga na Morogoro ambayo pia itapatiwa mafunzo kuanzia tarehe 13 hadi 14 Agosti, 2024.

Bw. Miraji Lukindo Afisa Tarafa Halmashauri ya Wilaya ya Rombo mkoa wa Kilimanjaro amemshukuru Mheshimiwa Rais… kupitia Ofisi ya Rais TAMISEMI kwa kuwapelekea mafunzo hayo muhimu na kwamba yatamsaidia katika kusimamia miradi ya maendeleo kuanzia kusimamia mpango wa manunuzi, uundaji wa kamati na ujenzi wenyewe ili miradi ilete tija kwa jamii kwani Serikali inawapelekea fedha nyingi za utekelezaji wa miradi ya maendeleo.

Mafunzo hayo ya siku mbili yametolewa na Ofisi ya Rais TAMISEMI kupitia Programu ya Uimarishaji wa Tawala za Mikoa na Serikali za Mitaa (Regions and Local Government Strengthening Programme-RLGSP) kwa kushirikiana na Chuo cha Serikali za Mitaa Hombolo pamoja na Chuo cha Utumishi wa Umma ambapo kwa mkoa wa Kilimanjaro jumla ya washiriki 199 ambao ni Watendaji wa Kata 169 na Maafisa Tarafa 30 wamepatiwa mafunzo hayo ili kwenda kuimarisha utendaji wao wa kazi katika ngazi ya msingi.