KITUO CHA AFYA KIGONIGONI CHAKABIDHIWA UTRA SOUND

Imewekwa tar.: April 25th, 2023

OR - TAMISEMI

Timu ya usimamizi shirikishi kutoka Ofisi ya Rais, Tawala za Mikoa na Serikali za Mitaa (OR-TAMISEMI) imemkabidhi Mkuu wa Wilaya ya Mwanga Mhe.Abdallah Mwaipaya mashine ya Utra Sound itakayotumika katika Kituo cha Afya Kigonigoni Kilichopo katika Halmashauri ya Wilaya ya Mwanga.

Makabidhiano hayo yamefanyika Aprili 24, 2023  katika Ofisi ya Mkuu wa Wilaya ya Mwanga.

Mwaipaya ameishukuru Serikali kwa kuendelea kuboresha utoaji wa huduma ya Afya ya Msingi nchini na kusisitiza kuwa  uimarishaji wa huduma bora za afya ni chachu katika kuleta maendeleo endelevu kwa kila mwananchi.

 "Kwa niaba ya wananchi wa Mwanga nimshukuru Mhe. Rais Samia Suluhu Hassan kwa kuendelea kuboresha utoaji wa huduma bora za afya katika miaka hii miwili,tunaendelea kuunga mkono jitihada hizi,"amesema Mwaipaya

Awali, timu hiyo kutoka OR-TAMISEMI  ilitembelea na kukagua utekelezaji wa ujenzi wa Hospitali ya Wilaya ya  Moshi na kushauri Halmashauri ya Wilaya ya Moshi kuongeza kasi katika utekelezaji wa ujenzi huo ili 

ukamilike kwa wakati.

"Tupo nyuma ya utekelezaji wa mradi huu, tuongeze kasi ili ujenzi huu ukamilike kwa wakati na wananchi waanze kupata huduma katika hospitali hii, "amesema Mkurugenzi wa Idara ya Afya, Ustawi wa Jamii na Lishe Tamisemi, Dk. Ntuli Kapologwe 

Aidha, amemshauri mhandisi wa Halmashauri hiyo kuandaa mpango kazi wa utekelezaji utakaorahisisha na kuharakisha utekelezaji huo na kukamilisha kwa wakati ili kuwaondolea adha wananchi ya kutembea umbali mrefu kufuata huduma.