JAFO: Wataalam fanyeni upya tathmini ya gharama za ujenzi Hospitali ya Uhuru.

Imewekwa tar.: September 13th, 2019

WAZIRI wa Nchi, Ofisi ya Rais,Tawala za Mikoa na Serikali za Mitaa(OR-TAMISEMI) Mhe. Selemani Jafo amewataka wataalam wa ujenzi kutoka SUMA JKT na Wakala wa Majengo Tanzania (TBA) kukaa chini na kutafakari namna ya kujenga hospitali ya Uhuru kwa gharama nafuu kulingana na fedha iliyopo sh bil 3.

Mhe Jafo ametoa maagizo hayo wakati akiwa kwenye ziara ya kikazi ya kukagua ujenzi wa hospitali hiyo na kupokea taarifa kutoka kwa msanifu majengo kutoka Suma JKT Bw. Michael Gama wanaojenga hospitali hiyo na kusema gharama za ujenzi ni sh bil 6.1.

Amefafanua kuwa hospitali hiyo inajengwa na  Rais wa Jamhuri ya Muungano wa Tanzania  Dkt John Magufuli kutokana na mapenzi yake kwa wananchi hivyo kushindwa kuikamilisha ina maanisha watu na vyombo vya serikali vimeshindwa kuendeleza juhudi zake.

“Mimi niwaagize wataalam kakaeni chini mtafakari jinsi gani tutajenga hii hospitali itajengwa lakini kwa style hii haiwezekani, angalau tungekuwa hatuna fedha lakini fedha tunayo bil 3, hivyo tafakarini nini kifanyike jengo hili liweze kujengwa” Amesisitiza Mhe. Jafo.

Ameendelea kusema,  litakuwa jambo la ajabu kama Nyang,wale na Kyerwa walipata sh bil 1.5 ujenzi wa hospitali na zimekamilika halafu hapa ishindikane kwa sh bil 3 na wataalam wote wapo hapa jambo hilo haliwezekani.

“Na ndio maana nilitaka majengo haya yapewe vyombo vya serikali maana wao ndio wanajua maono na dhamira ya Rais wetu katika kuhakikisha inakuwepo hospitali ya Uhuru,sasa mimi nimejivua kama waziri wake kazi yangu nataka jengo hili likamilike kwa gharama ya shilingi bilioni 3.

Ameendelea kuhoji kuwa kazi imeanza lakini shida ni kwenye gharama za ujenzi hivyo ujenzi utaanza lakini hautakamilika wakati dhamira ya serikali ni wananchi wapate huduma bora za afya, natamani tungeweka majengo yetu ya kawaida lakini kwa hapa ni tofauti hivyo sina uhakika wa kukamilisha ujenzi wa Hospitali hiyo.

 Wakati huohuo msanifu majengo kutoka SUMA JKT wamekubali kukaa chini  na kuangalia gharama za ujenzi katika usanifu ili kufikia muafaka wa kuendelea na ujenzi hadi kukamilika kwa gharama iliyotolewa na Serikali.

Awali akiwasilisha taarifa ya mradi huo  Bw. Gama amesema ujenzi wa mradi huo ulianza agosti 16 na kwa sasa wamefikia hatua ya uchimbaji wa msingi na matarajio yakiwa kukamilisha uchimbaji huo septemba 16 mwaka huu.

Hata hivyo amesema bado hawajasaini mkataba bali wamesaini makubaliano ya awali na ndio hayo wanayotumia kufanyia kazi kwa kuwa wanaendelea na mapatano ya gharama ya ujenzi.

Kwa upande wake mhandisi kutoka Wakala wa Majengo (TBA) Bw. Elias Tillya amesema ili kuendana na kiasi cha fedha kilichopo inabidi kupunguza mita za mraba za jengo ambazo ni 4400 kwa sasa.

Nae Mkurugenzi wa Halmashauri ya Wilaya ya Chamwino Bw.  Athuman Masasi amesema hawakuridhishwa na gharama ya ujenzi ya shilingi bil 6 hivyo tayari walishafanya mazungumzo  na wataalam kuona haja ya kukaa pamoja na kuliona hilo.

“kwa mujibu wa utaratibu wa kisheria waliouweka ilikuwa tufanye negosition kati ya halmashauri na wao,sasa tulichoshauriana tukasema hebu fedha tulizotoa mil 900 kazi ifanyike ili tuone itaishia wapi wakati maelewano ya bei inaendelea,na ndio maana hatujafunga nao mkataba” Amesisitiza Bw. Masasi.

Aidha hospitali hiyo inajengwa baada ya Rais Magufuli kufuta sherehe za Uhuru mwaka jana na fedha zake kiasi cha sh bil 1.5 kuelekezwa kwenye ujenzi huo na kuongeza sh bil 1.5 nyingine zilizotokana na gawio la kampuni ya simu ya Airtel.

Na. Angela Msimbira CHAMWINO