Jafo azitaka Asasi za Kiraia nchini (AZAKI) kulisemea mema Taifa.

Imewekwa tar.: November 8th, 2019

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo amezitaka Asasi za Kiraia nchini (Azaki) kuendelea kulisemea mema Taifa ili kujenga uzalendo nchini.

Ameyasema hayo leo wakati akifunga Mkutano wa majadiliano ya wiki ya Asasi za Kiraia Nchini (Azaki) yakifanyika katika ukumbi wa Morena Jijini Dodoma.

Mhe. Jafo amesema ifike mahali Azaki mbalimbali nchini kuhakikisha wanatangaza maendeleo yaliyofanyika nchini hasa katika sekta ya afya, elimu, ujenzi wa miundombinu ya barabara, umeme maji na maendeleo mbalimbali yaliyofanyika nchini.

Amezitaka Azaki hizo kujenga hoja kwa wafadhili ili waweze kupata fedha ambazo zitasaidia kutangaza mazuri yaliyofanywa na Serikali katika Awamu ya Tano ya Uongozi chini ya Rais wa Jamhuri ya Muungano wa Tanzania Mhe. John Pombe Magufuli ambapo itasaidia kuwajuza wananchi mema yaliyofanywa na Serikali yao.

“Kama Serikali kwa kutumia kodi za wananchi na  imeweza kufanya maendeleo mbalimbali nchini, Azaki hazina budi  kuwa mstari wa mbele kutangaza na kusemea  mazuri yaliyofanywa na Serikali ili wananchi wajue na mseme bila kuona aibu huo ndio uzalendo” Amesisitiza Mhe. Jafo

Hata hivyo, Mhe Jafo amesema kuwa mstakabali wa Nchi ya Tanzania ulivyofikia hivi sasa chini ya Uongozi wa Rais wa Jamhuri ya Muungano wa Tanzania Dkt. John Pombe Magufuli umetokana na mchango mkubwa  wa Asasi za Kiraia nchini   kwa kusoa na kuleta mabadiliko nchini.

Mhe. Jafo ameendelea kufafanua kuwa Ofisi ya Rais Tawala za Mikoa na Serikali za Mitaa itaendelea kushirikiana na Asasi za kiraia ili kuleta mabadiliko katika utendaji kazi na kuleta maendeleo katika jamii.

” Sisi ni wadau wakubwa wa Azaki kwa sababu zinagusa moja kwa moja maisha ya wananchi wetu,jukumu letu ni kuziunganisha  Halmashauri zote 185 na malengo yetu ni kutoa huduma  bora kwa wananchi,” amesisitiza Mhe. Jafo

Mhe. Jafo amesema kuwa Azaki  pamoja na Serikali zinajenga nyumba moja ambapo lengo likiwa ni  kuleta maendeleo kwa jamii, hivyo ifike mahali  tujenge ushirikiano  ambao utaisogeza nchi  katika uchumi wa kati na kuleta mabadiliko.

Aidha,ametoa rai kwa Katibu Mkuu Ofisi ya Rais Tawala za Mikoa na Serikali za Mitaa kuhakikisha Asasi za Kiraia (Azaki) hazicheleweshwi kupata vibali vya kufanyia kazi pale wanapokidhi vigezo katika Mikoa na Halmashauri  nchini na kuwataka Wakuu wa Mikoa kuharakisha mchakato wa vibali  kwa haraka ili Azaki hizo ziweze kutekeleza majukumu yao kwa wakati.