Jafo Ataka Mikoa Tisa Kuendelezaji Miradi ya EQUIP-T

Imewekwa tar.: July 25th, 2019

Waziri wa Nchi ofisi ya Rais TAMISEMI Mhe. Selemani Jafo ameitaka Mikoa na Halmashauri zilizokuwa na miradi ya elimu chini ya Serikali na Mpango wa Kuinua Elimu nchini (EQUIP-T) katika shule za msingi nchini unaendelezwa. 

Waziri Jafo ametoa kauli hiyo wakati akizindua majengo ya shule shikizi cha Malole katika Halmashauri ya Wilaya ya Nzega mkoani Tabora kilichojengwa kwa ufadhili wa shirika la maendeleo la kimataifa DFID kupitia program ya EQUIPT ambapo mbali na uzinduzi huo ametoa wito kwa Mikoa tisa na Halmashauri 63 zilizokuwa na mradi huo kuwa zinaendeleza malengo ya mradi ikiwa ni pamoja miundombinu iliyojengwa, ujuzi waliopatiwa na vifaa mbalimbali vya kusaidia taaluma.

Aidha, ameupongeza Mpango wa Kuinua Elimu nchini (MKUE) kwa kutoa ufadhili wa stadi za kujua kusoma na kuandika (KKK) ambazo zimesaidia sana kuongeza idadi ya watoto wanaojua kusoma na kuandika.

“watoto wengi walienda mbali sana kupata elimu lakini sasa shule shikizi zinasaidia watoto kupata elimu katika mazingira ya karibu”

Waziri Jafo ameridhishwa na utekelezaji wa miradi ya Mpango wa Kuinua Elimu mkoani Tabora na kusema kuwa miongoni mwa mikoa iliyofanya vizuri katika usimamizi wa miradi ni Tabora na ameeleza jinsi Serikali ilivyoridhishwa na matumizi ya fedha za Wadau kiasi cha Shilingi bilioni Mia sitakatika kuinua elimu.

Kabla ya uzinduzi huo waziri Jafo pia alitembelea miradi mbalimbali ikiwemo mradi wa ufugaji mbuzi katika shule ya Msingi Isimba na mradi wa ufugaji samaki katika shule ya Msingi Simbo ambayo imepatiwa fedha kupitia Mpango wa EQUIP-T chini ya shirika la DfID la Uingereza.

Kwa upande wake Mkuu wa mkoa wa Tabora Aggrey Mwanri amesema upatikanaji wa Shule hizi utasaidia kuongeza Ufaulu kwa wanafunzi kwani zimepunguza umbali kwa wanafunzi kwenda shuleni kutafuta elimu.

Naye Mwakilishi wa shirika la maendeleo la Uingereza (DfID) Elizabeth Arthy amesema kuwa shirika hilo lilitoa Shilingi bilioni 600 katika utekelezaji wa miradi hiyo na kwamba yeye kwa niaba ya Serikali ya Uingereza anaridhishwa na ujenzi na utekelezwaji wa Programu hiyo baina yake na Serikali ya Tanzania.

                            Anaandika Fred Kibano OR - TAMISEMI