Jafo apongeza Chuo cha Serikali za Mitaa kwa kuboresha miundombinu kwa kutumia mapato ya ndani

Imewekwa tar.: August 13th, 2020

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo ameupongeza uongozi wa chuo cha Serikali za Mitaa (LGTI) kwa kutumia mapato ya ndani kujenga kumbi za miadhara, madarasa na nyumba za waalimu.

Ametoa pongezi hizo leo wakati akizungumza  mara baada ya kuweka jiwe la msingi  katika majengo  hayo na  kuzindua  kuanza kwa program ya kutoa shahada  ya utawala na menejimenti katika Mamlaka za Serikali za Mitaa, uliofanyika katika ukumbi wa Mikutano, Hombolo Jijini Dodoma.

Waziri Jafo amesema hatua hiyo ni ya kuigwa kwani ni chuo cha kwanza kilichoweza kupiga hatua ya kujenga majengo kwa kutumia mapato ya ndani.

Ujezi wa jengo la kwanza la miadhara lenye uwezo wa kuchukua wanafunzi 500 limegharimu Shilingi milioni 246, ukumbi wa pili umegharimu Shilingi 226, madarasa mawili ambayo kila mmoja linauwezo wa kuchukua wanafunzi 250 linagharimu shilingi milioni 274 na nyumba yenye thamani ya milioni 99,majengo haya yote yamejengwa kwa kutumia “Force Account”

Ameviagiza vyuo vyote vya Serikali kuiga mfumo wa Chuo cha Serikali za Mitaa ambao wametumia mapato yao ya ndani kuongeza majengo kwa ajili ya kuwasaidia wanafunzi kuwa katika mazingira mazuri ya kujifunza na kufundishia.

Waziri Jafo amepongeza hatua ya uongozi wa chuo hicho kwa kutekeleza agizo la kuanza kutoa shahada ya kwanza na kusisitiza haja ya chuo hicho kuangalia namna ya kuanza na shahada ya ukutubi ili kuwarahisishia wananchi wanaotaka kujiendeleza au kusoma fani hiyo.

Naye, Dkt. Mpamila Madale Mkuu wa Chuo cha Serikali za Mitaa    amesema uwepo wa ongezeko la wanafunzi limechangia kuongeza mapato ya ndani ambayo yamefanya kuboresha miundombinu ili ikidhi mahitaji ya ongezeko hilo.

Ameendelea kufafanua kuwa chuo hicho  kina mkakati wa kujenga jengo la utawala,ujenzi wa jengo katika  tawi la miji ili kuondokana na adha ya kulipa pango inayowakumba kwa sasa ambapo wamekuwa wakilipa Shilingi  milioni 75 kwa mwaka

Aidha, amesema kwa msimu ujao, chuo hicho kinatarajia kudahili wanafunzi 7,000 na kuwa tayari wameashaanza kutoa kozi ya shahada ya utawala na menejimenti katika Serikali za Mitaa.

Madale amesema kwa sasa wako katika hatua za kuandaa mitaala kwa ajili ya kuanzisha kozi za shahada ya utawala na rasilimali watu, shahada ya ukutubi na Maendeleo ya jamii.

Awali, Meneja wa Milki, Mhandisi Frank Massawe amesema katika awamu ya kwanza wameweza kujenga jengo moja lenye nyumba mbili za watumishi ambapo mpango wa chuo ni kujenga majengo 10 kwa kutumia mapato ya ndani.

Na. Angela Msimbira HOMBOLO