Waziri Jafo Aingilia Kati Usafiri wa Wanafunzi wa Bweni

Imewekwa tar.: March 20th, 2020

Na Fred Kibano

Waziri wa Nchi Ofisi ya Rais Tawala za Mikoa na Serikali za Mitaa TAMISEMI, Mhe Selemani Jafo (MB) amewaagiza wakuu wa wilaya kushirikiana na wakurugenzi wa halmashauri  kuhakikisha wanafunzi waliofunga shule kutokana na tishio la maambukizi ya homa ya virusi vya corona wanapata usafiri wa kurejea majumbani mwao.

Akizungumza na Waandishi wa Habari ofisini kwake Jijini Dodoma leo, Mhe.Jafo amewaagiza Viongozi hao kuratibu zoezi zima la usafiri wa wanafunzi wa bweni kwa shule za msingi na sekondari ili waweze kurejea makwao kwa amani na utulivu badala ya kutangatanga maeneo ya vituo vya mabasi kama walivyoonekana kwenye baadhi ya maeneo ya miji kama stendi ya Msamvu Manispaa ya Morogoro wakihaha kutafuta usafiri wa kuwarejesha majumbani mwao.

“Niwatake Wakuu wa Wilaya wote, Wakurugenzi wa Halmashauri wote na Wakuu wa shule wote kwamba katika maeneo yenu hakikisheni wale vijana ambao bado hawajapata usafiri mpaka sasa mnaratibu vizuri usafiri wa kwenda majumbani mwao kwa usalama na amani”

Waziri Jafo amesema kwamba hatarajii kusikia au kuona wanafunzi hao waliofunga shule wanazurura stendi na kwenye mitaa kwa ajili ya adha ya usafiri wakati Mkuu wa Mkoa na timu nzima ya Viongozi wapo kwa ajili ya kuwahudumia wananchi wakiwemo wanafunzi.

“Sitarajii kabisa kusikia tena baada ya maelekezo haya kwamba vijana wanaendelea kutangatanga kwenye maeneo ya stendi au mitaani wakati Mkuu wa Mkoa yupo, Mkuu wa Wilaya, Mkurugenzi yupo”

Aidha, amewataka Wakuu wa Shule kuwasiliana na vyombo vya Ulinzi na Usalama kupitia Wakuu wa Wilaya na   Wakurugenzi endapo linatokea tatizo lenye kuhitaji usaidizi wakati wa kufanya zoezi hilo kwenye maeneo yao.

Katika hatua nyingine Waziri Jafo amewapongeza Wakuu wa shule za Kilakala kwa kuratibu vizuri usafiri wa mabasi ambapo waliondokea shuleni kwao kwa mabasi na kufikia hii leo wanafunzi wa kanda ya Kiteto na Simanjiro ndio waliobakia hali kadhalika Dodoma sekondari ambapo Mkuu wa shule alikodi mabasi kwa wanafunzi wote na wazazi kutuma nauli baada ya zoezi hilo kufanyika.  

Awali Waziri Jafo amesema tayari Katibu Mkuu Ofisi ya Rais TAMISEMI Mhandisi Joseph Nyamhanga aliiandikia barua Mikoa kuhusu maelekezo ya namna ya zoezi la kufunga shule na kuwarejesha wanafunzi majumbani mwao kwa utaratibu unaofaa.  

Ikumbukwe kuwa changamoto ya ugonjwa wa homa ya virusi vya corona (COOVID 19) umeikumba Tanzania na Dunia kwa ujumla ambapo Serikali inaendelea kukabiliana nao kupitia Wizara ya Afya, Jinsia, Wazee na Watoo,  Vitengo vya Maafa na majanga nchini na Wadau mbalimbali wa ndani na nje na sasa shule zote za msingi, sekondari na vyuo vimefungwa kwa mwezi mmoja baada ya maelekezo ya Waziri Mkuu wa Tanzania Mhe. Kassim Majaliwa Majaliwa.