Jafo aagiza wataalamu kufanya utafiti wa maji yaliyochini ya ardhi mradi wa Stendi ya Mabasi

Imewekwa tar.: July 9th, 2020

Waziri wa Nchi Ofisi ya Rais Tawala za Mikoa na Serikali za Mitaa Mhe Selemani Jafo  ametoa ushauri kwa  uongozi wa Halmashauri ya Wilaya ya Moshi Mjini kukaa na wataalam  ili wafanye utafiti  wa kina wa   jinsi ya kukabiliana  na maji  yaliyopo chini ya ardhi katika eneo lililojengwa  kituo cha Mabasi.

Ametoa kauli hiyo leo baada ya kukutana na uongozi  wa Mkoa na Wilaya ya Moshi wakati akikagua miradi ya maendeleo inayotekelezwa katika Halmashauri hiyo.

Mhe. Jafo amesema kuwa kwa sasa maji yanapita katika eneo hilo lakini yakiwa yamepungua, huku wataalamu wakiendelea  kutafuta ufumbuzi kwa maji  kujaa yakitokea chini ya Ardhi.

Ameupongeza Uongozi wa Mkoa wa Moshi kwa usimamizi mzuri wa miradi ya maendeleo hasa katika ujenzi wa miradi ya kimkakati japokuwa  mradi huo umekuwa na changamoto  ya  jengo kujaa maji kwa chini.

Aidha Mradi wa Stendi ya Mabasi Mkoani huo utagharimu  shilingi bilioni 28 fedha ambazo zilitolewa na Serikali kwa Halmashauri kwa ajili ya ujenzi wa Miradi ya kimkakati.

Wakati huohuo, Mkurugenzi wa Halmashauri ya Wilaya ya Moshi Bw. Michael Mwandesi  ameeleza kuwa mradi wa stendi ya mabasi umepata changamoto kubwa ya jengo kujaa maji chini jambo ambalo lilisababisha Halmashauri kusimamisha ujenzi kwa ajili ya kufanya uchunguzi wa chanzo cha maji hayo.

Amesema mpaka sasa wataalam wameshafanya utafiti wa kina na imegundulika kuwa  jengo hilo halijaathrika na maji hayo, kutokana na uimara mkubwa wa jengo hilo.

Akizindua ujenzi wa barabara yenye urefu wa kilometa 1 kwa kiwango cha lami Mhe. Jafo ameupongeza Mkoa huo kwa kuweza kusimamia ujenzi wa barabara hiyo ambayo imejengwa  kwa kiwango kinachokubalika.

Wakati huohuo,  Mhe. Jafo alikagua ujenzi wa ukarabati wa shule Kongwe ya Ashira na Weruweru na kuwapongeza uongozi wa Halmashauri hiyo kwa usimamizi mzuri wa ukarabati wa shule hizo